Ijtimoiy tarmoqlarda “Surxondaryo viloyati Denov tumanida Daraxt kesish poygasi davom etmoqda” sarlavhasi ostida xabarlar tarqaldi.

Davlat ekologiya qo‘mitasi mazkur holat yuzasidan rasmiy munosabat bildirdi.

Qayd etilishicha, Surxondaryo viloyati Ekologiya va atrof-muhitni muhofaza qilish boshqarmasining davlat inspektorlari tomonidan olib borilgan o‘rganishlarga ko‘ra, “Denov tuman yo‘llardan foydalanish” unitar korxonasining uchastka bo‘limi boshlig‘i J.F tomonidan 109 tup qimmatbaho daraxtlarni ruxsatnomasiz kesib tashlanganligi aniqlangan.

Mazkur shaxs o‘z xatti-harakati bilan o‘simlik dunyosiga jami 329 mln. 157,5 ming so‘m zarar yetkazgan. 

Aniqlangan holat yuzasidan tegishli hujjatlar rasmiylashtirilib, uchastka bo‘lim boshlig‘i J.F. ga nisbatan MJtKning 79-moddasi 1-qismi bilan ma’muriy bayonnoma rasmiylashtirilib bazaviy hisoblash miqdorining 10 barobari, ya’ni 2 mln. 245 ming so‘m miqdorida jarima jazosi belgilandi.

Hozirda jarima va o‘simlik dunyosiga yetkazilgan zararni udirish choralari ko‘rilmoqda.

Shu bilan birgalikda "Denov tuman yo‘llardan foydalanish” unitar korxonasiga xar bir kesilgan daraxtlar o‘rniga 100 donadan, ya’ni 10 900 dona qimmatbaho daraxt ko‘chatlari ekish va 3 yil davomida ekilgan ko‘chatlarni parvarish qilish haqida ko‘rsatma berildi.

Ma’lumot uchun, 2020-yil 9-aprelida Prezidentning “2020–2022-yillarda Surxondaryo viloyatining Denov tumani va uning markazini kompleks ijtimoiy-iqtisodiy rivojlantirish to‘g‘risida” PQ–4667-sonli qarori qabul qilingan.

Ushbu qarorga asosan yo‘l qurilishga halaqit berayotgan 857 dona kam qimmatli daraxtlarni kesish uchun Denov tuman hokimligining 000020-sonli Ruxsatnoma berilgan. O‘z navbatida har bir kesilgan daraxt va butalar uchun kompensasiya tarzida 10 tup qimmatliligi jihatidan kesiladigan daraxt va butalardan kam bo‘lmagan, yirik o‘lchamli (balandligi 2 metrdan kam bo‘lmagan) ko‘chat ekish hamda ularni kamida ikki yil davomida parvarish qilish vazifasi yuklatilgan.