“O‘zbekiston ipotekani qayta moliyalashtirish kompaniyasi” AJ O‘zbekistonda ikkilamchi bozorga ipoteka kreditlarini ajratish ipotekani qayta moliyalashtirish kompaniyasi moliyalashtirish manbalari aniqlangunga qadar to‘xtatilganini ma’lum qildi.

Ma’lumki, O‘zbekistonda ipoteka bozorini takomillashtirish maqsadida, Moliya vazirligi va Osiyo taraqqiyot banki xamkorligida O‘zbekistonda ipoteka bozorini rivojlantirish dasturi va uni 2019–2021-yillarda amalga oshirish konsepsiyasi ishlab chiqilgan. Konsepsiyaga muvofiq Dasturning asosiy vazifalaridan biri etib, O‘zbekiston Prezidentining 2019-yil 13-maydagi PQ-5715-sonli qarori ilovasi bilan belgilangan yo‘l xaritasiga asosan “O‘zbekiston ipotekani qayta moliyalashtirish kompaniyasi”ni ta’sis etish va faoliyatini yo‘lga qo‘yish hisoblanadi.

Dasturga muvofiq, Kompaniya faoliyatini boshlash uchun dastlabki bosqichda Osiyo taraqqiyot bankining 150 million AQSh dollari miqdoridagi qarz mablag‘lari tijorat banklarining maqbul ipoteka kreditlari portfelini qayta moliyalashtirish uchun ajratilishi ko‘zda tutilgan bo‘lib, ushbu resurslarni bosqichma-bosqich 2023-yilning birinchi choragi yakuniga qadar o‘zlashtirish rejalashtirilgan edi.

“Biroq, aholining ipoteka krediti hisobiga ikkilamchi bozordan uy-joy sotib olishga bo‘lgan katta qiziqishi hamda tijorat banklari tomonidan aholining ushbu talabini qondirish maqsadida faol kreditlar ajratishi natijasida, Dasturda nazarda tutilgan mablag‘lar muddatidan avval, ya’ni 2022-yilning birinchi choragi davomida o‘zlashtirib bo‘linishi kutilmokda. Ushbu haqida tijorat banklari 2021-yilning dekabr oyida, Dastur bo‘yicha qoldiq mavjud resurslar doirasida yetarlicha maqbul ipoteka krediti portfellari shakllantirishi lozimligi yuzasidan Kompaniya tarafidan yozma ravishda xabardor qilingan edi”, – deyiladi “O‘zbekiston ipotekani qayta moliyalashtirish kompaniyasi” AJ munosabatida.

Ta’kidlanishicha, bugungi kunda Kompaniya Moliya vazirligi va boshqa institutlar bilan birgalikda, shu jumladan, xalqaro tashkilotlar bilan ham, ipoteka kreditlarini qayta moliyalashtirish maqsadida resurslarni jalb qilish bo‘yicha faol ravishda tegishli ishlarni olib bormoqda.

• Ipoteka
• O‘zbekiston