Ўзбекистон ички эҳтиёжларни қондириш мақсадида табиий газ экспортини тўхтатди. Бу ҳақда Xabardor.uz’га Энергетика вазирлиги Матбуот хизмати маълум қилди.  

Шунингдек, 2022 йилда Ўзбекистон томони Россияга табиий газ экспортини режалаштирмаган.

“Айни пайтда Россия Федерациясига газ етказиб берилмаяпти, 2022 йилга ҳам режа қилинмаган”, – дейди вазирлик вакили.

“Интерфакс” бераётган маълумотга кўра, Ўзбекистон 2018 йилда “Газпром”га 3,8 миллиард куб метр етказиб берган. 2019 йилда етказиб бериш ҳажми 4,9 млрд. метр кубга етган. 2020 йилда эса газ етказиб бериш тўхтатилган. Бундан ташқари, 2020 йилда “Газпром” туркман газини Ўзбекистонга етказиб беришни бошлаган.

“Биз Ўзбекистонда истеъмолнинг катта ўсишини кузатаяпмиз. Шу боис, табиийки, газ хариди у ёки бу даражада қисқаради, чунки давлат газни ўз эҳтиёжлари учун йўналтиради”, – деган эди 2021 йил май ойида ўзбек гази билан боғлиқ вазиятга “Газпром” бошқаруви раиси ўринбосари Елена Бурмистрова.

Статистик маълумотларга кўра, 2020 йилда Ўзбекистонда табиий газ қазиб олиш ҳажми 47,1 миллиард куб метргача қисқарган (2019 йилда 57,3 млрд. метр куб). Шу билан бирга, ички истеъмол ҳам деярли ўзгармаган – 43 миллиард куб метр (2019 йилда 44,4 млрд. куб метр).

Ўзбекистон газининг асосий харидори Хитой ҳисобланади. ХХР божхона маълумотларига кўра, 2020 йилда 3,277 миллиард куб метр газ етказиб берилган бўлса, 2021 йилнинг 10 ойи давомида етказиб бериш икки баробардан кўпроққа ошиб, 4 миллиард 200 миллион куб метрга етган.

• Экспорт
• Газ
• Россия