Ўзбекистонда пардозбоп тош саноатида хомашёдан тўлиқ фойдаланиш ва ишлаб чиқариш чиқиндиларини қайта ишлаш бўйича янги талаблар белгиланмоқда. Бундан буён янги пардозбоп тош конлари “ноль чиқинди” тамойили асосида ишлаш шарти билан аукционга чиқарилади.
Маълумотларга кўра, мамлакатдаги 155 та корхона йилига 1 миллион тонна хомашё қазиб олади. Бироқ унинг 35–40 фоизигача бўлган қисми ишлаб чиқариш чиқиндиси сифатида қолмоқда. Айниқса, Нурота, Ғозғон ва Қўшработдаги конлар атрофида гранит ва мармар қолдиқлари тўпланиб қолган.
Президент Шавкат Мирзиёев ривожланган давлатлар тажрибасидан келиб чиқиб, соҳада “ноль чиқинди” тамойилини кенг жорий этиш зарурлигини таъкидлади. Қайд этилишича, тош қолдиқларидан композит пол қопламалари, сунъий тош плиталар ва мармар кукуни каби маҳсулотлар ишлаб чиқариш мумкин.
Масъул идораларга бир ой муддатда тадбиркорларни жалб қилган ҳолда пардозбоп тош конлари атрофида камида 100 миллион долларлик лойиҳаларни бошлаш топширилди.
Янги тартибга кўра, пардозбоп тош конларини ўзлаштиришда хомашёдан тўлиқ фойдаланиш ва чиқиндиларни қайта ишлаш асосий шартлардан бири бўлади.
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!