Республика божхоначилари томонидан 2022 йилда 749 кг оғирликдаги гиёҳвандлик воситалари ушлаб қолинган. Бу эса 2021 йилга нисбатан 42 фоизга кўпроқ деганидир. Бу ҳақда АОКАда ўтказилган брифингда Божхона қўмитаси ахборот хизмати раҳбари в.б. Ҳусан Тангриев маълум қилди.

Шунингдек, 316 минг дона кучли таъсир қилувчи дорилар, 5,3 минг дона психотроп моддалар қонунбузарлардан олиб қўйилгани маълум қилинди.

2022 йилда давлат бюджетига 46,2 трлн сўм миқдорида божхона тўловлари ундирилди ва белгиланган режа 114 фоизга бажарилди.

Тадбиркорлик субъектларини қуллаб-қувватлаш мақсадида божхона тўловларидан 56,6 трлн сўм миқдорида имтиёз ва тариф преференциялари қўлланилди.

Шунинглек, божхона тўловларини кечиктириб тўлаш тартиботлари соддалаштирилиб, ўтган йилда тадбиркорлар 5,6 трлн сўм миқдоридаги божхона тўловларини тўлашда ушбу имкониятдан фойдаланишган.

Бундан ташқари қиймати 14,6 млрд сўмлик 38 кг. дан зиёд тилла ва бошқа заргарлик буюмлари ҳам аниқланган. Бу кўрсаткич 2021 йилга нисбатан 5 фоизга кўп.

Шунингдек, божхона чегаралари орқали 2021 йилга нисбатан 6,7 баробарга кўп миқдорда, яъни 4,5 млн долларга тенг нақд хорижий валюталар ушлаб қолинган.

Божхона органларининг тамаки маҳсулотларининг ноқонуний айланмасига чек қўйишга қаратилган тезкор чора-тадбирлари натижасида 2022 йилда қиймати 19,8 млрд сўмлик 1 млн. 620 минг қути тамаки маҳсулотлари ушлаб қолинган.

Маданий ва тарихий бойликларини асраб қолиш доирасида ўтказилган чора-тадбирлар натижасида ўтган йилда 1 565 дона маданий бойликларнинг божхона чегаралари орқали ноқонуний олиб ўтилишининг олди олинган (2021 йилга нисбатан 15 фоизга ошган).

Маълумот учун, 2022 йилда аниқланган жами 17 мингдан ортиқ божхона қонунбузилиши ҳолатларида 844 млрд сўмлик товарларнинг ноқонуний ҳаракатига чек қўйилган.

Қайд этиш мумкин, бугун, 26 январь – давлат божхона хизмати органлари ходимлари куни