“Activist” лойиҳаси асосчиси Ҳожиакбар Носировга “кўпиртирилган” айб қўйилиб, адолатсизлик қилинган. Бу ҳақда Табиат ресурслари вазирининг маслаҳатчиси Расул Кушербоев ўзининг Теlegram'даги каналида ёзиб қолдирди.

“Биринчидан, блогернинг ёгуртлар бўйича билдирган фикри, яъни ёгуртлар таркибида кармин моддаси бор йўқлигига ойдинлик киритилмаган. Агар у айтган ёгуртлар таркибида шундай модда бўлиб, бу ислом динига эътиқод қилувчилар учун истеъмолда мумкин эмас бўлса, блогер ҳақиқатни айтган бўлиб чиқади.

Иккинчидан, бирор бир маҳсулот таркибида мусулмонлар учун ҳалол ёки ҳаром модда бор ёки йўқлиги ҳақида маълумот берганлик, гапирганлик қачондан бери диний адоватни уйғотадиган бўлиб қолди? Қатор колбаса ва бошқа озиқ овқатлар ҳақида ҳалол сўзини ишлатиб реклама тарқатганлар унда нима учун шу вақтгача жавобгар бўлишмаган?

Учинчидан, блогернинг айнан қайси гап ёки ҳаракати жамиятда диний адоват уйғотгани тегишли мутахассис ва экспертлар томонидан тасдиқландими? Бунга ойдинлик киритилмаган.

Тўртинчидан, блогернинг ёгурт ҳақидаги фикри ишлаб чиқарувчига зарар етказган, деб ҳисоблаган тақдирда компаниялар блогерни судга бериши мумкин. Бу жараёнга ҳуқуқни муҳофаза қилувчи идоралар бир томоннинг ёнини олиб аралашиши керакмас.

Бешинчидан, "ИИБ ходимига бўйсунмаслик", деган модда истаган одамни ичкарига олиб кириш учун ишлатиладиган айрим орсизларнинг "дежурный статяси"га айланиб қолгани учун, бу модда "страховка" учун қўйилган, деган фикр туғилмоқда. Агар диний адоват моддаси синса, ушбу модда захирада турсин учун.

Юқоридагиларга кўра, Activist лойиҳаси асосчисига берилган жазода диний адоватдан кўра кўпроқ шахсий адоват борга ўхшайди”,– деб ёзади у.

• Rasul Kusherbayev