“Ўзбеккосмос” агентлиги ишчи гуруҳи Франция Олий аэронавтика ва космонавтика институтига ташриф буюрди.

Учрашув давомида Франция томони институт ҳақида тақдимот ўтказди. Институт аэрокосмик соҳада кадрлар тайёрлаш бўйича асосий университет ҳисобланиб, дунёда етакчилардан биридир. Институт 15 факультет, 1900 талаба ва 23 патентга эга. Институт томонидан Франция Миллий космик тадқиқотлар маркази (CNES), “Airbus”, “Thales”, “Ariane Group” каби компаниялар ва ташкилотлар билан ҳамкорлик алоқалари ўрнатилган.

Учрашув давомида “Космик хизматлар ва иловалар” магистратура дастури билан танишилди. Дастур 6 ой академик таълим ва 6 ой илғор космик компанияларда амалиёт ўташни қамраб олади. Дастурда космик тизимлар, Ерни масофадан зондлаш, сунъий йўлдошли алоқа, сунъий йўлдошли навигация ва космик хизматлар ва иловалар йўналишларида ўқитилади. Мазкур магистрлик дастурига 2022-2023 ўқув йиллари учун ўзбекистонлик талабаларни юбориш масаласи юзасидан 5 нафар талаба учун квота ажратиш, ҳамда оператив тарзда танлов ўтказиш ва молиялаштириш масалаларини ҳал этишда ҳамкорликда ишлаш масаласи келишиб олинди.

Бундан ташқари, агентлик ходимлари учун 1-3 ой муддатли малака ошириш дастурларини ташкил этиш масаласи муҳокама қилинди ҳамда мазкур дастур устида ҳамкорликда ишлашга келишиб олинди.

• Fransiya
• Ҳамкорбанк
• Ўзбекистон
• Ўзбеккосмос