Сурхондарё вилояти бозорларида пиёзнинг бир килограмми 4–4,5 минг сўмдан сотилмоқда. Қишлоқ хўжалиги вазирлиги нарх ошишига муносабат билдириб, бунга мавсумий омиллар, транспорт харажатлари ва айрим савдогарларнинг юқори устамалари таъсир қилаётганини маълум қилди.

Вазирлик ҳисоб-китобларига кўра, 2026 йилда Ўзбекистонда 1,5 миллион тонна пиёз етиштирилиши кутилмоқда. Бу ички истеъмол эҳтиёжидан 400 минг тонна ёки 35 фоизга кўп. Жорий йилнинг дастлабки тўққиз ойида Сурхондарёда 387,1 минг тонна пиёз етиштирилган. Унинг 120 минг тоннаси ички истеъмолга йўналтирилган, 46 минг тоннаси экспорт қилинган, қолган қисми бошқа ҳудудларга етказиб берилган.

Вазирлик маълумотига кўра, Сурхондарёнинг тупроқ-иқлим шароити пиёзни асосан апрель–май ойларида етиштиришга мос. Шу сабабли кузда пишадиган пиёз катта майдонларда экилмайди. Айни пайтда вилоятда жорий йил ҳосилидан қолган пиёз тугаган ва маҳаллий бозорлар Жиззах ҳамда Самарқанддан келтирилаётган маҳсулот ҳисобига таъминланмоқда.

Пиёзнинг харид ва етказиб бериш харажатлари ҳам нарх шаклланишига таъсир қилмоқда. Жиззахда маҳсулотнинг бир килограмми 2 600–3 300 сўмдан, Самарқандда эса 2 800–3 000 сўмдан харид қилинмоқда. Сурхондарёга ташиш харажати килограммига 350–370 сўмни ташкил этади. Вазирлик айрим савдогарларнинг савдо устамаси 25–50 фоизгача етаётганини ҳам нарх ошишининг сабабларидан бири сифатида қайд этган.

Шунингдек, 2026–2027 йиллар қиш-баҳор мавсуми учун республика бўйича 102,8 минг тонна пиёз захираси шакллантирилмоқда. Шундан 2 750 тоннаси Сурхондарё вилоятига ажратилиши белгиланган. Вазирлик захирадаги маҳсулотларни ички бозорга чиқариш ва махсус савдо расталарида арзонлаштирилган нархларда сотиш имконияти мавжудлигини билдирган.

Ҳозирда айрим ҳудудларда пиёз ҳосилини йиғиб олиш давом этмоқда. Вазирлик нархларни барқарорлаштириш мақсадида захирадаги маҳсулотларни бозорга чиқариш чораларини кўриш мумкинлигини маълум қилган.