Афсонавий “Queen” гуруҳи яккахони Фредди Меркьюрига тегишли 1500 та буюм унинг собиқ севгилиси ва дўсти Мэри Остин томонидан кимошди савдосига қўйилди. Таниқли ижодкорга тегишли буюмлар орасида саҳна либослари, қўлёзмалар ва бошқа кўплаб буюмлар мавжуд. Айни вақтда ушбу буюмлар Фредди Меркьюрининг Кенсингтондаги уйида сақланмоқда.

Лотлар орасида Британия монархларининг тожи кўринишида ишланган бош кийими, сунъий мўйна ва ялтироқ тошлар билан безатилган ёпинчиқ ҳам бор. Меркьюри 1986 йили Небуортда сўнгги марта чиқиш қилганда айнан мана шу саҳна либосида бўлган ва “God Save the Queen” қўшиғини ижро этган.

Шунингдек, аукцион иштирокчилари “We are the Champions” қўшиғининг матни ёзилган қўлёзма, 1975 йилда ишлаб чиқарилган “Mercury Martin D-35” акустик гитараси каби қимматли лотларни қўлга киритиш имкониятига эга бўладилар. Бундан ташқари, Фредди Меркьюрининг дунё бўйлаб саёҳатлари вақтида сотиб олинган суратлар ва артефактлар ҳам аукционга қўйилган. 

Тўплам аввалига Нью-Йорк, Лос-Анжелес, Гонгконг ва Лондон шаҳарларида кўргазмага қўйилади. Шундан кейин аукцион ўтказилади ва қимматли лотлар ўз эгаларига топширилади.

• Аукцион
• Маданият
• Шоу-бизнес
• машҳурлар