Умра сафарига кетаётганда саломатлиги ёмонлашган ўзбекистонликларга Бош консуллик томонидан амалий кўмак кўрсатилгани маълум қилинди.

Унга кўра, Ўзбекистоннинг Дубай шаҳридаги Бош консуллиги ходимлари Телеграм ижтимоий тармоғи орқали икки нафар кекса ёшдаги Ўзбекистон фуқароси Умра сафарига кетаётган чоғида “Шаржа” халқаро аэропортининг транзит йўловчилар ҳудудида соғлиги ёмонлашиб қолгани ва Шаржа амирлигининг “Ал Қосимия” шифохонасига шошилинч тарзда олиб борилганидан хабар топган.

Фуқаролар 26 сентябрь куни Умра сафарини бажариш учун “Madina Muslim Tours” хусусий сайёҳлик ширкати орқали Наманган–Шаржа–Мадина–Шаржа–Наманган йўналиши бўйича ҳаво қатновига чипта олган. Уларга ширкат томонидан масъул бўлган вакил - Элликбоши томонидан лозим даражада эътибор кўрсатилмаган.

Хабарга кўра, бош консулхона ходимлари қийин аҳволда қолган кекса ёшдаги фуқароларга консуллик-ҳуқуқий ёрдам бериш ва уларни Ўзбекистонга қайтариш мақсадида “Ал Қосимия” шифохонаси масъуллари ҳамда Шаржа халқаро аэропортининг ҳуқуқни муҳофаза қилувчи идоралари масъул ходимлари билан музокаралар ўтказган. Натижада, мамлакат фуқароларига шифохонага тўланиши лозим бўлган 4400 АҚШ долларидан воз кечиш ва Шаржа–Тошкент йўналиши бўйича бепул авиачипта билан таъминлаш бўйича келишувга эришилган.

• Наманган
• Ўзбекистонлик
• Умра