16 июлга ўтар кечаси Россия Қуролли Кучлари Украинанинг Виннитса шаҳрига йирик ҳужум уюштирди. Натижада 7 киши яраланган. Бу ҳақда, Виннитса вилояти ҳарбий маъмурияти раҳбари ўринбосари Наталя Заболотная Facebook орқали маълум қилди.

Унинг сўзларига кўра, зарбалардан сўнг саноат ва фуқаролик инфратузилмаси объектларига зарар етган.

Маълумотларга кўра, етти нафар жабрланганлардан беш нафарига куйиш ташхиси қўйилган. Икки нафарининг аҳволи оғир, уч нафарининг эса ўртача оғирликда экани расмийлар томонидан билдирилди.

Харков шаҳри ҳам кечаси Россия қўшинлари томонидан ўққа тутилган. Вилоят давлат маъмурияти раҳбари Олег Синегубовнинг сўзларига кўра, 20 дақиқада 17 та портлаш қайд этилган ва дастлабки маълумотларга кўра, уч киши жароҳат олган.

Тунги ҳужум Кривой Рог шаҳрида ҳам амалга оширилган. Шаҳарда электр таъминотида катта узилишлар кузатилган. 17 ёшли ўсмир оғир яраланган, шаҳар мудофаа кенгаши раҳбари Александр Вилкулнинг маълумотига кўра, шифокорлар унинг ҳаёти учун курашмоқда.

• Россия
• Украина
• Уруш