“Юртимиз дипломатлари Туркиянинг Мерсин вилоятидаги ватандошлар ҳолидан хабар олдилар”, – деб хабар қилмоқда “Дунё” ахборот агентлиги.

Сафар хорижда вақтинча меҳнат фаолиятини амалга ошираётган Ўзбекистон фуқароларига консуллик-ҳуқуқий ёрдамлар кўрсатиш ва Ўзбекистонда чет элда мушкул аҳволда қолган ўзбекистонликларни қўллаб қувватлаш мақсадида эълон қилинган “Ватанга қайтариш” инсонпарварлик акцияси доирасида ташкил этилган.

Ташриф доирасида Мерсин вилоятидаги ўзбекистонликлар учун сайёр консуллик қабули ташкил этилган. Сайёр қабул давомида 18 нафар фуқароларга “Ватанга қайтариш” хайрия инсонпарварлик акцияси доирасида Миграция жамғармаси маблағлари ҳисобидан авиачипта харид қилиб берилган. Улар “Uzbekistan Airways” авиакомпанияси томонидан ташкил этилган чартер рейс билан Анталия-Тошкент йўналиши бўйича ватанга қайтарилган.

Бундан ташқари, ташриф давомида Ўзбекистон фуқароларини уюшган ҳолда жойлаштириш мақсадида Мерсин вилоятидаги “Asya Fel Group” компанияси масъуллари билан музокара ўтказилган.

Музокаралар давомида компания директори Эрен Ўзтурк Туркиянинг Нигде вилоятида янги қурилаётган ишлаб чиқариш фабрикасига ишчи кучига эҳтиёж борлигини билдирган ва ушбу бўш ўринларга Ўзбекистон фуқароларини жалб қилишга тайёрлигини таъкидлаган.

Маълумот учун, “Аsya Fel Group” компанияси 2010 йилда иссиқхона материаллари ишлаб чиқариш мақсадида ташкил қилинган. Шунингдек, мазкур корхона Навоий вилоятида 147 гектар майдонда иссиқхона барпо қилган.

• Ўзбекистонлик
• Туркия
• fuqaro