The Insider Нашрнинг хабар беришича, Буюк Британия, Швеция, Франция, Германия ва Нидерландия россиялик мухолиф сиёсатчи Алексей Навальнийнинг биоматериал намуналари таҳлилини ўтказган.

Маълум қилинишича, бир нечта мустақил лабораториялар ушбу намуналарда Жанубий Америкадаги қурбақаси терисидан олинадиган ўта заҳарли модда — эпибатидинни аниқлаган.

Сиёсатчи “Новичок” моддаси билан заҳарланганидан сўнг уни даволаган реаниматолог шифокор Александр Полупаннинг сўзларига кўра, Алексей Навальнийда ўлимидан олдин кузатилган симптомлари эпибатидиннинг таъсири ҳақида маълум бўлган маълумотларга мос келади.

Беш давлатнинг қўшма баёноти Буюк Британия ҳукумати расмий сайтида эълон қилинди.

“Буюк Британия, Швеция, Франция, Германия ва Нидерландия Алексей Навальний ўта хавфли токсин билан заҳарланганига ишонч билдиради. Бу Алексей Навалнийдан олинган намуналарнинг таҳлилларига асосланган ҳукуматларимиз хулосаларидир. Ушбу таҳлиллар намуналарда эпибатидиннинг мавжудлигини аниқ тасдиқлади.

Эпибатидиннинг заҳарлилиги ва тасвирланган симптомларни инобатга олган ҳолда, ўлимнинг энг эҳтимолий сабаби заҳарланиш бўлган. Навальний Россия қамоқхонасида вафот этди, бу эса Россияда унга ушбу заҳарни юбориш учун восита, сабаб ва имконият бўлганини англатади”, – дейилади қўшма баёнотда.

Марҳум сиёсатчининг беваси ҳам Х ижтимоий тармоғида шу каби маълумотларга бағишланган пост қолдирди.

“Бешта Европа давлатининг олимлари турмуш ўртоғим Алексей Навальний эпибатидин — ер юзидаги энг кучли заҳарлардан бири бўлган нейротоксин билан заҳарланганини аниқлади. Табиатда бу заҳар Эквадор дарахт қурбақасининг терисида учрайди. У фалажликка, нафас олишнинг тўхташига ва азобли ўлимга олиб келади.

Мен биринчи кунларданоқ турмуш ўртоғим заҳарланганига ишонардим, аммо энди бунга далиллар бор. Владимир Путин Алексейни кимёвий қурол билан ўлдирди. Икки йил давомида синчковлик билан иш олиб борган ва ҳақиқатни очиб берган Европа давлатларига миннатдорлик билдираман”, — деб ёзди Юлия Навальная.

• Алексей Навалний
• Заҳарланиш