Андижон вилоятида Nexia-3 русумли автомобиль ҳайдовчиси пиёдалар ўтиш жойидан ўтаётган икки нафар мактаб ўқувчисини уриб кетди. Бу ҳақда вилоят ЙҲХБ маълум қилди.

Хабар берилишича, кеча, 12 октябрь куни соат 14:30 лар атрофида, Андижон туманининг  “Қурама” МФЙ ҳудудидан  ўтган А-373 Халқаро аҳамиятга эга автомобиль йўлининг 343-километрида, 1969 йилда туғилган ҳайдовчи С.Р. ўзининг Nexia-3 русумли транспорт воситасини “Боғишамол - Жалақудуқ” йўналиши бўйлаб бошқариб кетаётиб, тартибга солинмаган пиёдалар ўтиш жойидан йўлнинг ўнг тарафидан чап тарафига кесиб ўтаётган вояга етмаган пиёдалар Н.Й. ва Н.И.ни уриб юбориб, йўл-транспорт ҳодисаси содир этган.

Ушбу ЙТҲ оқибатида вояга етмаган пиёда Н.И. чап оёғидан жароҳат олган ва Республика шошилинч тиббий ёрдам илмий марказининг Андижон филиалига ётқизилган. Иккинчи пиёда Н.Й. эса тан жароҳати олмаган.

Мазкур ҳолат юзасидан ҳозирда Андижон тумани ИИБ томонидан терговга қадар текширув ҳаракатлари олиб борилмоқда.

• Андижон
• Ўқувчи
• YTH