“Яқин Шарқ минтақасида юзага келган нотинч вазият сабабли Ўзбекистон элчихонаси томонидан Қувайтдаги 42 нафар юртдошимиз автобус орқали Саудия Арабистонига ўтказилиб, сўнг ушбу давлатдан мамлакатимизга қайтариш чора-тадбирлари амалга оширилди”, – деб хабар қилмоқда “Дунё” агентлиги.

16 нафар катталар ва 26 нафар вояга етмаганлардан иборат ўзбекистонликлар шу йилнинг 9 март куни Тошкент вақти билан соат 23:50 да Қувайтдан автобус орқали йўлга чиқиб, 10 март куни соат 11:40 да Ар-Риёздаги Подшоҳ Холид номидаги халқаро аэропортга етиб келган.

Элчихона дипломатлари уларга енгиллик яратиш ҳамда уларнинг Қувайт ва Саудия Арабистони ҳудудида эркин ҳаракатланишидаги эҳтимолий қийинчиликларни бартараф этиш мақсадида, мазкур давлатларнинг ваколатли органларига тегишли ноталар чиқарган.

Шу билан бирга, 12 соатга яқин бўлган ушбу сафар давомида фуқароларга Қувайт ҳамда Саудия Арабистони давлат чегараларидан ўтиш жараёнларида кўмаклашиш, уларга Ар-Риёз аэропортида зарур ташкилий-амалий ёрдам кўрсатиш мақсадида Элчихонанинг икки нафар дипломати ҳамроҳлик қилган. Фуқароларнинг ватанга қайтишини таъминлаш мақсадида Ўзбекистон Миграция агентлиги томонидан тегишли авиачипталар харид қилинади.

10 март куни Ар-Риёз шаҳридаги Қирол Холид халқаро аэропортида Элчихона дипломатлари томонидан 42 нафар фуқарога Жидда шаҳрига учиш учун рўйхатдан ўтиш жараёнларида зарур консуллик-ҳуқуқий ва ташкилий кўмак кўрсатилиб, 9 нафар фуқаро СВ1081 рейси ҳамда 33 нафар фуқаро СВ1035 рейси билан Жиддага муваффақиятли кузатилган.

Шунингдек, ушбу 42 нафар фуқаролар Жидда шаҳридан Ўзбекистонга қайтиш авиабилетлари билан таъминланган ва жорий йилнинг 11 март куни Жидда – Тошкент авиарейси орқали Ўзбекистонга қайтади.

“Шу ўринда айтиш лозимки, минтақадаги беқарор вазият туфайли оила бошлиқлари фарзандларининг хавфсизлигидан хавотирланиб, фақат оила аъзоларини Ўзбекистонга юборишга қарор қилган. Шунингдек, иш берувчилар томонидан меҳнат фаолиятини тўхтатишга рухсат берилмагани ҳамда бундай талаб билан мурожаат қилиш келгусида фуқароларимизнинг касбий фаолияти ва ҳуқуқий мақомига салбий таъсир кўрсатиши мумкинлиги аниқланди. Шу сабабли, айни босқичда фақат аксарият аёллар ва болалардан иборат фуқаролар гуруҳининг Ватанга қайтиши ташкил этилмоқда”, – дейилади хабарда.

• Elchixona
• Konsullik
• Ўзбекистонлик