АҚШ Адлия вазирлиги ва 16 штат бош прокурорлари Аpple Inc компаниясини монополияга қарши қонунларни бузганликда айблаб, судга мурожаат қилди.

Даъво аризасида айтилишича, Аpple смартфонлар ва смартфон иловалари бозоридаги устун мавқеидан фойдаланиб, истеъмолчиларнинг iPhone билан қурилмаларини алмаштириш ёки бошқа ишлаб чиқарувчилар маҳсулотларидан фойдаланиш имкониятларини чекламоқда.

"Аpple смартфонлар бозоридаги монополь мавқеини нафақат рақобатчилардан ўзиб кетгани, балки монополияга қарши федерал қонунларни бузгани учун ҳам сақлаб турибди. Биз Аpple истеъмолчиларга ҳам, ишлаб чиқувчиларга ҳам зарар етказадиган рақобатга қарши хатти-ҳаракатлар стратегиясини қўллаётганини даъво қиламиз", — деди АҚШ бош прокурори Меррик Гарланд.

Apple компанияси даъвони рад қилмоқда ва бу одамлар кутган технологияларни яратиш қобилиятига путур етказишини таъкидламоқда.

"Бу ҳукуматга одамлар учун технология ривожини қаттиқ назорат қилиш имкониятини бериб, хавфли прецедент яратади", дейилади Аpple баёнотида.

Даъво ортидан 21 март куни Нью-Йорк биржа савдоларида Аpple акциялари 3,7 фоизга арзонлашди. Бироқ, охирги 12 ой ичида уларнинг қиймати 8,3 фоизга ошди.

• АҚШ
• Apple
• iPhone