13 март куни Оқ уйда НАТО бош котиби Марк Рютте билан учрашувда Қўшма Штатлар президенти оролнинг аннексия қилиниши мумкинлиги ҳақидаги саволга “Ўйлайманки, шундай бўлади. Бизга Гренландия халқаро хавфсизлик учун керак”, — деб жавоб берган.

Трамп, шунингдек, Рютте Гренландиянинг АҚШга қўшилишида “муҳим роль” ўйнашига ишонч билдирган. Ўз навбатида, Марк Рютте “НАТОни бу масала бўйича муҳокамаларга тортмоқчи эмаслигини” айтган, лекин Россия ва Хитойнинг оролга қизиқиши ортиб бораётганлиги сабабли Арктика хавфсизлиги учун Гренландия муҳимлигини тан олган.

Дания парламентининг мудофаа қўмитаси раиси Расмус Ярлов эса АҚШнинг даъволари “НАТОга аъзо икки давлат ўртасида урушга” олиб келиши мумкинлигини билдириб, Рюттенинг хатти-ҳаракатларини танқид қилган.

“Гренландия яқиндагина Даниядан дарҳол мустақил бўлишга қарши овоз берди ва ҳеч қачон АҚШ таркибига киришни истамайди”, – дея қўшимча қилган Ярлов.

• АҚШ
• Дания
• НАТО
• Трамп