“АҚШнинг 22 штати Трампнинг туғилганлик ҳуқуқи асосида фуқаролик беришни чеклаш ҳақидаги фармонига қарши судга мурожаат қилди”, – дея ёзмоқда Reuters.

Доналд Трамп кеча, 21 январь куни ўзининг президент сифатидаги биринчи иш кунида туғилганлик ҳуқуқи асосида фуқаролик беришни чеклаш тўғрисидаги фармонни имзолаган эди. Ушбу ҳужжат кучга кирганидан кейин 30 кун ичида туғилган болаларга нисбатан қўлланади. Ушбу фармонга кўра, чеклов ота-онаси АҚШ ҳудудида ноқонуний равишда яшаётган болаларга ҳам тегишли ҳисобланади.

Демократик партия вакиллари етакчилигидаги штатлар президент Доналд Трампнинг ушбу қарори устидан судга даъво аризаси беришди. Судга даъво аризаси киритганлар орасида Вашингтон, Орегон, Аризона, Иллинойс, Нью-Йорк, Калифорния, Колорадо, Коннектикут, Делавер, Гавайи, Мэн, Мериленд, Массачусетс, Мичиган, Миннесота, Невада, Нью-Жерси, Нью-Мексико, Шимолий Каролина, Род-Айленд, Вермонт ва Висконсин сингари штатлар бор.

Судга тақдим этилган даъво аризасига кўра, президент Доналд Трампнинг бу қарори АҚШ Конституциясининг 1868 йилда ратификация қилинган 14-тузатмасига зид ҳисобланади.

Маълумот учун, Трампнинг ушбу фармони ижроси бўйича Конституцияни ўзгартириш учун қонун АҚШ Конгресси аъзоларининг учдан икки қисми томонидан тасдиқланиши ва мавжуд 50 штатдан 38 таси томонидан қонуний тан олиниши керак.

• АҚШ
• Фармон
• Мурожаат
• Суд
• Трамп
• norozilik