Ижтимоий тармоқларда Ўзбекистон Бош вазири Абдулла Арипов амалдорларга динни ёки давлатдаги ишини танлаши кераклигини айтгани ҳақида хабарлар тарқалди. Бош вазир матбуот котиби Бекзод Ҳидоятов мазкур ҳолат юзасидан изоҳ берди.

Маълум қилинишича, жорий йил 10 сентябрь куни Абдулла Арипов бошчилигида Вазирлар Маҳкамаси биносида давлат ва жамоат ташкилотлари раҳбарлари иштирокида ўтказилган махсус мажлис тафсилотлари нотўғри талқин қилинмоқда.

Хабарга кўра, “Ўзбекистон Республикаси Бош вазири Абдулла Арипов ҳамда Давлат хавфсизлик хизмати (ДХХ) раиси Абдусалом Азизов иштирок этган мажлисда мамлакатда “диний радикаллашув кучайиб бораётганидан” ташвиш билдирилган. Мажлисда иштирок этган мулозимлардан бирининг Озодликка айтишича, давлат хизматчилари, ҳукумат аъзолари орасида ҳам хизмат жойларида намоз ўқиш, шаръий никоҳ асосидаги кўпхотинлилик ва диний русумдаги анжуманларга бориш тенденцияси кучайгани танқид остига олинган”.

“Гўёки Бош вазир амалдорларга қарата динни ёки давлатдаги ишини танлаши кераклигини айтгандек қилиб тарқатилаётган хабарлар ҳақиқатга мутлақо тўғри келмайди. Ўзбекистон Республикасининг “Виждон эркинлиги ва диний ташкилотлар тўғрисида”ги Қонунида фуқароларнинг диний эркинлиги ва диний эътиқоди ҳуқуқий жиҳатдан кафолатлаб қўйилган. Блогерлардан текширилмаган ва ёлғон ахборотларни тарқатмасликларини, тармоқ фойдаланувчиларидан эса бундай мавзудаги хабарларга умуман ишонмасликларини сўраймиз”, дейди Бекзод Ҳидоятов.

• Бош вазир
• Қонун