АҚШ президентлигидан кетаётган Жо Байден гиёҳванд моддалар билан боғлиқ жиноятлар учун судланган икки ярим мингга яқин маҳкумларнинг жазоларини енгиллаштирди.

Бу ҳақда Оқ уй матбуот хизмати маълум қилди.

“Ушбу ҳаракат тарихий хатоларни тузатиш ва муносиб бўлган фуқароларга ўз оилаларига қайтиш имкониятини бериш йўлидаги муҳим қадамдир”, – деган Байден.

Шунингдек, Байден 12 декабрда 1,5 минг кишига нисбатан жазони енгиллаштириб, зўравонликсиз жиноятлар учун айбланган 39 маҳкумни афв этган эди. У 23 декабрь куни ҳам ўлим жазосига ҳукм қилинган 40 кишидан 37 нафари учун жазони енгиллаштирди. Байден сайланган президент Доналд Трамп маъмуриятининг “қатлларни давом эттиришига” йўл қўймаслигини айтиб ўтган.

Маълум бўлишича, Байденнинг сўнгги қарори АҚШ президентлари томонидан чиқарилган индивидуал афв этиш ва жазони енгиллаштириш бўйича рекорд натижани ўрнатган.

• АҚШ
• Авф
• Байден
• Маҳкум