Белгиянинг Фламанд минтақасидаги Боргерхаут шаҳрида якшанба оқшомида узунлиги камида 2 километр бўлган ифторлик дастурхони ёйилди. Бу ҳақда “Kazinform” хабар берди.

Ифторлик тадбири Тюрнхаутсебаан кўчасида ташкил этилган. Унга эса 6 мингга яқин одам йиғилган.

“Бу йил католикларнинг Пасхаси мусулмонларнинг муқаддас Рамазон ойи ўрталарига тўғри келади. Шунинг учун биз ифторликка кўпроқ одамларни йиғишни хоҳладик”, - деди Белгиядаги турли диаспораларни бирлаштирган FMV ташкилоти вакили Латифа Эль Морабит.

Ифторликка ташриф буюрганлар Фаластин гуручли таомлари, макарон салати ёки Марокаш ошидан татиб кўрдилар.

Ўтган йили Боргерхаутда 1 километрлик дастурхон бошида ифторлик уюштирилди. Туман ҳокимлиги ташаббуси билан жорий йилда яна бир километр қўшилди.

Белгия оммавий ахборот воситаларининг қўшимча қилишича, Қатарнинг “Al Jazeera” телеканали Боргерхаутдаги "рекорд"га алоҳида репортаж бағишлаган.

• Бельгия
• iftorlik