Россия Федерацияси президенти Владимир Путин барча украиналиклар учун Россия фуқаролигини соддалаштирилган тарзда олиш ҳақидаги фармонни имзолади.

Ушбу фармонга кўра эндиликда нафақат ДХР , ЛХР, Херсон ва Запороже вилоятлари, балки бутун Украина аҳолиси ҳам соддалаштирилган тартибда Россия фуқаролигини олиш учун мурожаат қилишлари мумкин. Паспорт олиш учун улар аввалгидек Россия Федерациясида беш йил яшашлари, рус тилидан имтиҳон топширишлари ва даромад манбаига эга бўлишлари шарт эмас.

“Гап бизнинг қардош Украина халқи, шунча йиллардан бери фашистлар тузуми бўйинтуруғи остида бўлган одамлар ҳақида кетмоқда. Биз диндошларимиз, биз славянлармиз, биз бир хил маданиятли одамлармиз, тилимиз жуда ўхшаш, бизда жуда кўп оилавий, дўстона ришталар мавжуд. Менимча, бу (Путиннинг фармони) Россияга қарши лойиҳага муносиб жавобдир”, — дейди Федерация Кенгаши раҳбари Валентина Матвиенко ҳужжатнинг қабул қилинишига изоҳ бериб.

Бундан ташқари, фуқароликка қабул қилиш бўйича аризани кўриб чиқиш бир йил эмас, балки уч ой давом этадиган қилиб белгиланди.

Шунингдек, ўзининг мустқаиллигини эълон қилган “Донетск Халқ Республикаси (ДХР) ва Луганск Халқ Республикаси (ЛХР) фуқаролари ёки бутун Украина ҳудудида доимий яшовчи фуқаролиги бўлмаган шахслар, шу жумладан, илгари Россия фуқаролигига эга бўлган ва Россия фуқаролигидан воз кечганлар соддалаштирилган тартибда Россия Федерацияси фуқаролигига қабул қилиш учун ариза бериш ҳуқуқига эга”, – дейилади фармонда.

Ушбу тоифадаги фуқаролар Россия паспортини олиш учун одатий шартларни бажармасдан ҳужжатларни оладилар. Илгари бу жараён учун фақат Россия Федерациясида беш йил яшаб, тирикчилик манбаи бўлган ва рус тилидан имтиҳонни муваффақиятли топширган кишиларгина қабул қилинар эди.

Украина армиясида ҳарбий хизмат ёки ДХР ва ЛХР ҳуқуқни муҳофаза қилиш органларида ишлаш аризани рад этиш учун асос бўлмайди. Фуқаролик соддалаштирилган тартибда ДХР, ЛХР ёки бутун Украина ҳудудида доимий яшовчи шахсларга, уларнинг фарзандларига, шу жумладан асраб олинган болаларга, турмуш ўртоқларга ва ота-оналарга” берилади. Бундай ҳолда, доимий яшаш жойини тасдиқловчи ҳужжат бўлиши керак.

Паспорт олиш учун ариза беришда сизга Россия Федерациясида қолиш (яшаш) ҳуқуқини тасдиқловчи ҳужжатлардан бири (миграция картаси, вақтинчалик яшаш учун рухсатнома, яшаш учун рухсатнома, қочқин гувоҳномаси, вақтинчалик бошпана гувоҳномаси) ёки фуқаролик гувоҳномаси керак бўлади

• Фармон
• Fuqarolik
• Россия
• Украина