Наманган вилоятида болалар заҳарлангани ҳолати юзасидан жиноят иши қўзғатилди. Бу ҳақда Бош прокуратура матбуот котиби Ҳаёт Шамсутдинов маълум қилди.

Қайд этилишича, ушбу ҳолат юзасидан Жиноят кодексининг 257-1-моддаси (санитарияга оид қонунчиликни ёки эпидемияга қарши кураш қоидаларини бузиш) билан жиноят иши қўзғатилди.

Ҳозирда тергов ҳаракатлари олиб борилмоқда.

Эслатиб ўтамиз, жорий йилнинг 21 сентябрь куни Наманган вилоятида 71 нафар болада заҳарланиш аломатлари кузатилган ва шифохонага олиб келинган. 22 сентябрда эса Андижон вилоятида ҳам Антиструмин дорисининг ножўя таъсирлари сабаб 12 нафар болада заҳарланиш аниқланган. 23 сентябрь куни эса, Тошкент шаҳрида ҳам кўплаб болалар заҳарланиб, шифохонага ётқизилган.

Аввалроқ Соғлиқни савлаш вазири ўринбосари Элмира Боситхонова болаларнинг заҳарланишига овқат ҳам, дори ҳам сабаб бўлмаганини айтган эди. Шунга қарамай айнан унинг кўрсатмаси билан мактаб ва боғчаларга тарқатилган ёд препарати истеъмоли тўхтатилди. Ўзбекистон Республикаси Президенти Шавкат Мирзиёев Наманган вилоятининг Чуст туманида болаларнинг заҳарланиши ҳолатидан хабар топиб, бундан қаттиқ ташвишдалигини билдирганди. Президент ёрдамчиси Саида Мирзиёева ҳам президент топшириғи билан Наманган вилоятига бориб заҳарланган болаларнинг ҳолидан хабар олди.

• Андижон
• Жиноят
• Наманган
• Заҳарланиш