Олий таълим, фан ва инновациялар вазири Иброҳим Абдураҳмонов Ўзбекистонда ишга жойланмаган битирувчилари сони кўп бўлган ОТМ сифатсиз таълим бераётган муассаса деб топилиб, бундай ОТМларнинг фаолиятини тугатиш масаласи кўриб чиқилишини айтгани хабар берилган эди.

Собиқ депутат Расул Кушербаев вазирнинг ушбу фикрига муносабат билдириб, мантиқ ва қонун чегарасига тўғри келмайдиган ҳаракатлар узвий давом этаётганини қайд этган.

“Бу нормал жамият вазири эмас, “авторитар режим”га хос жамият мулозимининг таҳдиди. Янги вазиримиз ҳам автократия йўлидан кетмоқда.

Дарвоқе, нималар деяпсан, ҳаддингдан ошма дегувчи акалар: қанча хаспўшламайлик бизни шундоқ ҳам “авторитар режим”ли давлатлар қаторига қўшиб қўйишган. Бунинг асосий сабаби реал иш қолиб, кўп соҳада хўжакўрсинга ишлаш, катталарга “пахта қўйиш” билан вақт ўтказаётганимиз.

Тўғриси мен бирорта ҳам норматив ҳуқуқий ҳужжатда ОТМлар битирувчиларни ишга жойлаштиришга мажбурлиги ҳақида қоидани кўрмаганман. ОТМ вазифаси сифатли таълим бериш ва агар тегишли таълим даражага эга бўлса битирувчига диплом тутқазиш. Тамом вассалом!

Қизиқ: ҳориждаги нуфузли ОТМлар масалан, Гарвард, Оксфор, Кембридж кабиларга ҳам шундай талаблар қўйилганмикан? Улар қанақа вазирларнинг талабларидан келиб чиқиб шундай натижаларга эришган? Бу саволлар жаноб вазирга.

Бир нарса ойдинлашиб бормоқда: бу кетишда Ўзбекистонда бирорта ҳам ОТМ яқин орада топ-500 таликка кирмаса керак”, – дейди Кушербаев.

• ОТМ
• Oliy ta'lim, fan va innovatsiyalar vazirligi
• Rasul Kusherbayev