Кун.узнинг маълум қилишича, Бухоро вилоятининг Бухоро туманидаги “Шайхонча” маҳалласида икки нафар эркак электр токи уриши оқибатида ҳалок бўлган.

Бахтсиз ҳодиса 19 июлга ўтар кечаси содир бўлган. Хусусий тадбиркорга қарашли новвойхона ишчилари қўлбола мўри ўрнини ўзгартиришга уринган. Кўтарилиш вақтида конструкция 3,5 метр баландликдаги юқори вольтли симга тегди. Электр токи уриши натижасида тўрт нафар эркак тан жароҳати олди – улардан икки нафари олган жароҳатларидан воқеа жойида ҳалок бўлди. Яна икки киши касалхонага ётқизилган.

Марҳумларнинг жасадларини суд-тиббий экспертизадан ўтказиш, шунингдек, касалхонага ётқизилганларни экспертизадан ўтказиш белгиланган.

Мазкур ҳолат юзасидан Бухоро тумани ИИБ ҳузуридаги тергов гуруҳи томонидан Жиноят кодексининг 257-моддаси 2-қисми “а” банди (Меҳнатни муҳофаза қилиш қоидаларини бузиш) билан жиноят иши қўзғатилган. Ҳозирда ҳолат юзасидан дастлабки тергов ҳаракатлари олиб борилмоқда.

• Бухоро
• ИИБ