“Ўзбекистон Бош консулхонаси кўмагида Бирлашган Араб Амирликларининг Дубай шаҳрида мушкул аҳволда қолган уч нафар ҳамюртларимиз Ўзбекистонга қайтди”, – деб хабар қилмоқда “Дунё” АА.

Бош консулхонадан олинган маълумотларга кўра, ватандошларимиз И.Х., И.Г. ва унинг вояга етмаган фарзанди И.М. 2024 йил 22 декабрь куни яқин қариндошининг таклифи билан БААга келган ва Дубай шаҳрида ижара уйга жойлашган. Ўтган вақт мобайнида улар БААда бўлиш учун виза расмийлаштирмасдан ноқонуний яшаб келган.

Меҳмонларни БАА таклиф қилган шахс 23 февраль куни Қатарга чиқиб кетаётганлигини айтиб, алоқани узган. Март ойи бошида хонадон эгаси ижара пулини тўлаш кераклигини, агар ижара пули тўланмаса хонадонни тарк этишни талаб қилиб, ўзбекистонликларни кўчага ҳайдаган.

Фуқаролар билан суҳбат давомида уларнинг турар уй-жой, озиқ-овқат ва ватанга қайтиш учун маблағлари йўқлиги ойдинлашган.

Бош консулхона ходимлари Амирликлардаги “Аёллар ва болаларга ёрдам кўрсатиш маркази” хайрия ташкилоти ва фаол ўзбекистонликлар билан биргаликда ёрдамга муҳтож фуқароларга барча зарур ёрдамларни кўрсатишган.

Уларнинг БААда ноқонуний яшаб келган муддатда ҳисобланган 2 минг 178 АҚШ доллари миқдоридаги қарздорлик ушбу мамлакатнинг тегишли органлари билан олиб борилган музокаралар натижасида ижобий ҳал қилинган. 

“Узбекистан Airways” миллий авиакомпаниясининг БААдаги ваколатхонаси эса ҳамюртларимизнинг оиласи бағрига қайтиши учун “Дубай-Тошкент” ҳаво қатновига ҳеч қандай тўловларсиз чипта расмийлаштириб берган.

• Агентлик
• БАА
• fuqaro