Ўзбекистон ТИВ матбуот котиби Аҳрор Бурхоновнинг маълум қилишича, Россия Қуролли кучлари билан шартнома имзолаб, Украинага қарши урушда қатнашган 1 минг 110 нафар ўзбекистонлик фуқарога оид маълумотлар текширилмоқда.

Мазкур шахслар номи Украинадаги “Яшашни истайман” давлат лойиҳаси томонидан эълон қилинган рўйхатда келтирилган эди.

Ташқи ишлар вазирлиги вакили: “Ўзбекистон фуқароларининг хориждаги ҳарбий ҳаракатларда иштироки қонунчиликда тақиқланган. Агар бу тасдиқланса, тегишли чоралар кўрилади”.

Шунингдек, ТИВ вакили айрим фуқароларда Россия фуқаролиги мавжудлиги ҳақидаги хабарларга жавобан Ўзбекистонда икки фуқароликка йўл қўйилмаслигини эслатиб ўтган.

Ўзбекистон қонунчилигида:

– Жиноят кодексининг 154-моддасига кўра, ёлланиш, яъни низолашаётган давлатнинг фуқароси ёки ҳарбий хизматчиси ҳисобланмаган ёхуд назорат қилиниб турган низолашаётган давлат ҳудудида доимий яшамайдиган ёки ҳеч қандай давлат томонидан қуролли кучлар таркибида расмий топшириқни бажариш ваколати берилмаган шахснинг моддий манфаатдорлик ёки бошқа бирон шахсий манфаатни кўзлаб, ўзга давлат ҳудудида ёки унинг тарафини олиб қуролли тўқнашувда ёхуд ҳарбий ҳаракатларда қатнашиш учун ёлланиши 5 йилдан 10 йилгача озодликдан маҳрум қилиш билан жазоланади.

– Жиноят кодексининг 154−1-моддасига кўра, Ўзбекистон фуқаросининг чет давлатларнинг ҳарбий хизматига, хавфсизлик, полиция, ҳарбий адлия органлари ёки шунга ўхшаш бошқа органларига хизматга кириши базавий ҳисоблаш миқдорининг 300 бараваригача (112,5 млн сўм) миқдорда жарима ёки 3 йилгача ахлоқ тузатиш ишлари, хизматга ёлланиши эса 5 йилгача озодликдан маҳрум қилиш билан жазоланади.

• Ўзбекистон
• Россия
• Tashqi ishlar vazirligi
• Украина
• Уруш
• fuqaro
• tekshiruv