Энди қурилиш объектларини QR-код орқали кузатиш мумкин бўлади

Шавкат Мирзиёев раислигида бўлиб ўтган қурилиш индустрияси ва қурилиш материалларини ишлаб чиқаришни янада ривожлантиришга оид видеоселектор йиғилишида қурилиш-монтаж ишлари сифати масаласига алоҳида эътибор қаратилиб, бу борада бажарилиши шарт бўлган аниқ вазифалар белгилаб берилган эди.

Ушбу вазифалар ижросини таъминлаш, хусусан, Ўзбекистондаги қурилиш жараёнларни самарали ва шаффоф бошқариш мақсадида янги қурилишларда давлат назорати тизими жорий этилмоқда. Мазкур тизим замонавий рақамли ечимлар асосида ишлаб чиқилган бўлиб, қурилиш жараёнларини бошқариш, ҳужжатлаштириш ва назорат қилишда қулай имкониятлар яратади. Тизимнинг асосий мақсади қурилиш жараёнларини изчил бошқариш, ортиқча қоғозбозликка йўл қўймаслик ва инсон омили таъсирини камайтириш орқали сифат ва хавфсизликни таъминлашдан иборат.

Тизимнинг ўзига хос янгилиги ва имкониятлари қандай омилларда кўринади?

“Дастлаб чеклист тизимига тўхталамиз. Ушбу тизим билан қурилиш жараёнлари босқичма-босқич текширилади ва ҳар бир иш тури учун тўлдириладиган чеклистлар орқали сифат назорати амалга оширилиб, ҳужжатлаштириш жараёни соддалаштирилади”, – дейди Қурилиш ва уй-жой коммунал хўжалиги вазирлиги ахборот хизмати раҳбари Саидносир Усмонов. Тизим қурилиш корхоналарининг ҳолатини автоматик баҳолайди ва рейтинги паст бўлган ёки талабга жавоб бермайдиган корхоналарга рухсатнома бермайди.

Муҳим янгиликлардан яна бири, ҳар бир объект учун QR-кодли паспорт жорий этилган бўлиб, ушбу код орқали объект ҳақидаги барча маълумотларни реал вақт режимида олиш мумкин. Бу республикадаги барча фуқаролар ва жамоат назорати вакилларига қурилиш объектлар ҳолатини қулай тарзда кузатиш имконини беради.

Объектнинг фойдаланишга қабул қилиш жараёни ҳам анча соддалаштирилган. Эски тизимдаги 27 та чеклист банди ўрнига, янги тизимда фақат 7 та банд қолдирилиб, жараённи тезлаштириш ва ортиқча кечикишларнинг олдини олишга ёрдам берадиган тизим ишга тушган.

Қурилиш иштирокчилари учун интерактив ва қулай кабинетлар ишлаб чиқилган. Ҳар бир кабинет фойдаланувчига мослаштирилган бўлиб, бу орқали ички назорат, техник назорат, муаллифлик назорати ва инспекторлар учун алоҳида имкониятлар тақдим этилмоқда.

Қурилиш жараёнлари тизим орқали рақамлаштирилиб, қўшимча равишда объектлар реал вақт режимида кузатиб борилади. Яъни, инспектор объектни жойига чиқиб мониторинг қилиш билан биргаликда электрон ҳужжат ва фотосуратлар орқали объектнинг ҳолати бўйича қўшимча ўрганишларни амалга ошириш имкониятига эга бўлди.

Барча хулоса, ёзма кўрсатма ва тасдиқлар электрон ҳужжат айланиши орқали амалга оширилади. Бу эса қоғоз ҳужжатларига бўлган эҳтиёжни камайтириб, жараёнларни тезлаштиришга ёрдам беради.

Муҳими, қурилиш жараёнлари “Шаффоф қурилиш” миллий ахборот тизимига интеграция қилиниб, жараёнларнинг шаффофлиги оширилди ва коррупция хавфи камайтирилган.

• QR-kod
• qurilish