Унда аҳоли томорқаси ва ижара асосида ажратилган ер майдонларидан самарали фойдаланишни ташкил этиш тартиби тасдиқланди.
Қарор билан тасдиқланган низомга кўра, аҳоли томорқалари ва ижара ҳуқуқи асосида ажратилган ер майдонларида экин экилиши устидан назорат:
– маҳалла даражасида — “маҳалла еттилиги” ва “маҳалла банклари”
– туман даражасида — туман (шаҳар) штаблари ҳамда туман (шаҳар) ҳокимларининг тегишлилиги бўйича ўринбосарлари бошчилигидаги ишчи гуруҳлар;
– ҳудуд даражасида — Қорақалпоғистон Вазирлар Кенгаши раисининг ҳамда вилоятлар ҳокимларининг молия-иқтисодиёт ва камбағалликни қисқартириш масалалари бўйича биринчи ўринбосарлари бошчилигидаги ишчи гуруҳлар томонидан амалга оширилади.
Ижара ер майдонларида деҳқон хўжалиги томонидан экиш ишлари амалга оширилмаганда (форс-мажор ҳолатлари бундан мустасно) туман (шаҳар) штаблари томонидан ер майдонларини иккиламчи ижарага бериш чоралари кўрилади. Бунда тижорат банклари, туман (шаҳар) камбағалликни қисқартириш ва бандлик бўлимлари томонидан:
– камида 40 гектар ер участкасида “бир контур — бир маҳсулот” тамойили асосида юқори даромадли ва экспортбоп қишлоқ хўжалиги маҳсулотини етиштириш бўйича намунавий лойиҳалар амалга оширилади;
– қолган контурлардаги ижарага олинган ер участкаларида маҳсулот етиштиришни ташкил этиш учун ишчи гуруҳларга етакчи тадбиркорларни жалб қилган ҳолда лойиҳалар амалга оширилишида кўмаклашилади.
“Маҳалла еттилиги” хулосасига асосан аҳоли томорқалари ва ижарага олинган ер майдонларига экин экмаган ёки самарасиз фойдаланаётган шахсларга нисбатан қуйидаги таъсирчан чоралар кўрилади:
– томорқа ер эгалари ва деҳқон хўжаликларига давлат дастурлари доирасида имтиёзли кредитлар берилмайди;
– Ижтимоий ҳимоя ягона реестрига киритилган фуқаролар учун назарда тутилган имтиёзлар тўхтатилади;
“Онлайн маҳалла” электрон платформаси маълумотлари асосида экин экилмагани аниқланган йил учун ер солиғи ставкаси уч карра миқдорида ҳисобланади.
Томорқасини қаровсиз қолдирган хонадон эгалари энди уч карра юқори солиқ тўлаши ҳақида 2025 йилнинг февралида эълон қилинганди. Бу “Томорқа ер эгалари ва деҳқон хўжаликлари фаолиятида замонавий ташкилий тизимни жорий қилиш ва молиявий қўллаб-қувватлашнинг қўшимча чора-тадбирлари тўғрисида”ги президент фармонида кўзда тутилган.
Бунда берилаётган имтиёзларни вақтинча тўхтатиш, қайта тиклаш ва оширилган солиқ ставкаларини қўллаш “маҳалла еттилиги” хулосасига асосан амалга оширилади ва тегишли маълумотлар “Онлайн маҳалла” электрон платформасига киритиб борилади. Томорқа ва ижарага берилган ер майдонларидан самарали фойдаланиш йўлга қўйилган, яъни экин экиладиган майдонларига экин экилган тақдирда, “маҳалла еттилиги” кафиллиги билан барча имтиёзлар ва амалдаги солиқ ставкалари тиклаб берилади.
36°
Кечаси 23°
