Тошкент метрополитени тизими йўловчилар учун муҳим транспорт тури бўлиб, шаҳар бўйлаб қулай ва самарали ҳаракатланиш имконини беради.

Бироқ, метро йўловчилари дуч келадиган муаммолардан бири метрода ҳаракатланиш чоғида мобил алоқа ва юқори тезликдаги интернет хизматларининг етишмаслиги бўлган. Чунки метроларда ҳам мобил алоқа ва интернет ишлаши жуда муҳим бўлиб, фавқулодда вазиятларда ёки кутилмаган ҳолатларда йўловчилар тез ёрдам хизматларига мурожаат қилиши ёки яқинлари билан мулоқотга чиқиши зарур бўлиб қолиши мумкин.

“Тошкент метрополитени” ДУК матбуот хизмати ходими Тўйчи Мирзаевнинг маълум қилишича, бундан бир муддат олдин “Тошкент метрополитени” ДУК ҳамда “COSCOM” МЧЖ (савдо белгиси “Ucell”) ўртасида ўзаро ҳамкорлик меморандуми имзоланган.

Ушбу меморандумдан кўзланган мақсад Тошкент метрополитенининг бекатларида мобил алоқа тизимини янада такомиллаштириш, шунингдек, метрополитен тоннелларида ҳам босқичма-босқич мобил алоқа фаолиятини йўлга қўйишдан иборат бўлган.

Шу боисдан ушбу икки ташкилот масъул ходимлари томонидан Тошкент метрополитени бекат ва тоннелларида керакли техник ишлар амалга оширилди ҳамда синов тариқасида “Чилонзор” йўналиши метро тоннелларида “Ucell” мобил алоқа оператори фаолияти йўлга қўйилди.

Шунингдек, алоҳида таъкидлаш лозимки, келгусида метро тоннелларида юртимизда фаолият олиб борувчи барча алоқа операторлари фаолиятини йўлга қўйиш кўзда тутилган. Бу орқали йўловчилар мобил алоқа воситаларидан узилишларсиз фойдаланиши мумкин бўлади.

Эслатиб ўтиш лозимки, президент Шавкат Мирзиёевнинг 2021 йил 16 октябрдаги “Тошкент метрополитени фаолиятининг самарадорлигини ошириш чора-тадбирлари тўғрисида”ги қарорида ер усти ҳалқа метро бекати йўналишида йўловчилар учун бепул Wi-Фи тизимини йўлга қўйиш ва ер ости метро бекатларида мобил алоқа операторлари хизматларидан фойдаланиш имкониятларини яратиш борасида бир қанча вазифалар белгилаб берилган.

Хусусан, 31 та ер ости метро бекатида йўловчилар учун мобил алоқа операторлари томонидан овозли сўзлашувлар ва кенг полосали интернет хизматлардан 100 фоиз фойдаланиш имкониятлари яратилган, 17 та ер усти бекатида ҳам алоқа ва интернет хизматларидан фойдаланиш имкониятлари мавжуд.

• Metropoliten
• Тошкент
• aloqa