Қирғизистоннинг Сўқулук тумани Селекционное қишлоғида яшовчи фуқаро ўзининг собиқ хотинининг хонадонига бостириб кириб, калтаклаб, пичоқ билан уни бурни ва қулоқларини кесиб ташлаган. Бу ҳақда маҳаллий ОАВ хабар берди,

Қайд этилишича, аёл эри билан 10 йил бирга яшаган, уларнинг 15 ва 10 ёшли икки нафар фарзанди бор. Мунтазам калтаклар ва безорилик туфайли у 5 йил олдин эрини ташлаб кетган. 2022 йилда эр-хотин расман ажрашишган.

Никоҳ бузилганига қарамай, собиқ эр аёлни “ёлғиз қолдирмаган”. “У мунтазам равишда унинг ишига келиб, жанжал қилган, калтаклаган ва зўрлаган”, деди жабрланувчининг амакиваччаси.

Жабрланувчининг синглисини маълум қилишича, “ушбу воқеа содир бўлишидан уч кун олдин аёл полицияга мурожаат қилган, бироқ маҳаллий полиция ходими унинг яқинлашиб келаётган хавф ҳақидаги сўзларига бепарволик билан қараб унга тайинли жавоб бермаган. Туман милицияси ходими билан суҳбатдан уч кун ўтиб, собиқ эр аёлининг фарзандлари билан яшаётган уйи остонасида пайдо бўлган”.

Аёл кенжа фарзандини мактабга олиб кетиш учун хонадондан чиқаётганида эри уни уйга итариб юбориб, ўзи ичкарига кириб, эшикни ёпган. У собиқ хотинини калтаклаган, кейин пичоқни олган. У собиқ хотинининг бурни ва қулоқларини кесиб ташлаган. Фақат шу билан кифояланмай, тонг отгунча уни қийноққа солган.

"Қулоқлар, қулоқ тугунлари - ҳаммаси йиртилган, у буни махсус пичоқ билан қилган. Бу жуда нозик иш эди. Бурун бутунлай кесилган. Докторлар кесилган аъзоларни жойига тикишди, аммо буларнинг барчаси илдиз отадими ёки йўқми, билмаймиз”, - дейди жабрланувчининг опаси.

Таъкидланишича, ушбу воқеа содир бўлган вақт давомида эр-хотиннинг ўн ёшли боласи отаси онасини ҳақорат қилган хонада бўлган. Бола кўрпа остига яширинган ва ҳамма нарсани эшитган.

Жабрланувчи ҳозир касалхонада. Шифокорлар унинг аҳволини барқарор ва оғир деб баҳоламоқда. Опанинг сўзларига кўра, аёл жарроҳлик амалиётидан ўтган, бироқ унинг тўлиқ тузалиб кета олиши ҳали аниқ эмас.

“Операция 9 соат давом этди, шифокорлар ҳаммасини бир жойга жамлашда жуда синчковлик билан ҳаракат қилишди. Олдинда ҳали бир нечта операциялар бор ва бизга кўп маблағ керак бўлади, шунинг учун мен синглимга ёрдам бериш учун маблағ тўплашни эълон қилдим. У эшитадими ёки йўқми ҳали номаълум. Энди у ҳатто гапирмайди, - деди аёлнинг қариндоши.

Жабрланувчининг опаси куёвининг устидан бир неча бор полицияга шикоят қилишганини таъкидлаган.

“Биз кўп марта полицияга мурожаат қилдик ва калтакланганларни видеога олдик ва суд-тиббий экспертиза ўтказдик. Полиция келганида икки кунга олиб кетишди, кейин қўйиб юборишди. Бўлимдан чиққанидан 20 дақиқа ўтгач, у аллақачон синглимнинг уйида эди. Уни қўрқитиб, калтаклаган”, - дейди у.

Опанинг айтишича, қариндоши туман милицияси ходимига мурожаат қилган пайтларнинг бирида, турмуш ўртоқлар аллақачон ажрашган бўлса-да, милиция ходимлари содир бўлаётган воқеани оилавий масала деб атаб, аралашишдан бош тортишган.

"Бу оилавий масалалар, биз қонун олдида ожизмиз", – деган туман милицияси ходими.

Ушбу шов-шувли воқеадан сўнг, Қирғизистон Ички ишлар вазирлиги матбуот хизмати полиция “оилавий зўравонлик ҳолатларининг олдини олишга катта эътибор қаратаётганини” маълум қилди.

“Селеционное қишлоғида содир бўлган жиноятга алоҳида эътибор қаратилмоқда. Ички ишлар вазири, полиция генерал-лейтенанти Улан Ниёзбеков мазкур ҳолат юзасидан холис ва ҳар томонлама тергов ўтказилишини таъминлаш учун шахсан ўз назоратига олди. Бундан ташқари, ички ишлар органлари ходимларининг ҳаракатларининг қонунийлиги ички тергов хизмати томонидан қўшимча равишда текширилади”, – дея қўшимча қилди бошқарма.

Қирғизистонлик аёлнинг собиқ турмуш ўртоғига нисбатан қўзғатилган жиноий иш “Соғликка зарар етказиш” моддаси бўйича таснифланган. У ҳозир кутаётган максимал муддат - 12 йил қамоқ, аммо бу одам ҳатто бундай жазони ҳам олиши аниқ эмас.

• Жиноят
• Oila
• Қирғизистон