Ижтимоий тармоқларда аёл киши кийимидаги шахсни бир нечта фуқаролар самосуд қилаётгани акс этган видео тарқалди. Ҳолат юзасидан Фарғона вилояти ИИБ изоҳ берди.

Маълум бўлишича, жорий йилнинг 14 ноябрь куни соат тахминан 03:00 да фуқаро У.Ю. аёллар кийимини кийиб олган ҳолда йўловчи автомашинада Бувайда туманидан қайтаётиб, Бағдод туманининг Бордон МФЙ чорраҳасида тушиб қолган. Катта йўл бўйида турган вақтида шу қишлоқда яшовчи фуқаролар унинг эркак киши эканини сезиб қолиб, видеотасвирга олишган.

У.Ю. бу ердан қочиб, шу атрофдаги фуқаро Т.Э.га тегишли уйнинг том қисмига чиқиб яширинган. Уй эгаси номаълум шахсни ўғирликка тушганликда гумон қилиб ушлаб, бу ҳақида вилоят ИИБнинг 102 рақамига мурожаат қилган.

Мазкур ҳолат юзасидан фуқаро У.Ю.га нисбатан Бағдод туман ИИБ томонидан Маъмурий жавобгарлик тўғрисидаги кодекснинг 183-моддаси билан, уни видеотасвирга олиб, интернетда тарқатиб юборган фуқаро М.Х.га ушбу кодекснинг 46-моддаси прим 1-моддаси билан ҳужжатлар расмийлаштирилган.

Ҳозирда терговга қадар текширув ҳаракатлари давом эттирилмоқда.

• Фарғона
• ИИБ
• Самосуд