Жиззахда фарзандини 3 миллион сўмга сотмоқчи бўлган ота-она қамалди. Бу ҳақда Олий суд матбуот котиби Азиз Обидов хабар берди.

Қайд этилишича, фуқаро ўзининг шаръий никоҳидаги турмуш ўртоғи билан жиноий тил бириктириб вояга етмаган 2021 йилда туғилган фарзандини 3 миллион сўм эвазига сотаётган вақтида далилий ашёлар билан ушланган.

Шундан сўнг, Жиноят ишлари бўйича Жиззах шаҳар судида судланувчи эр-хотинга нисбатан суд ҳукми ўқилди.

Унга кўра, судланувчи эркак Жиноят кодексининг 135-моддаси (Одам савдоси) 3-қисми “а” банди билан 8 йилга озодликдан маҳрум этилган.

Судланувчи аёлга эса Жиноят кодексининг 135-моддаси 3-қисми “а” банди билан Жиноят кодексининг 57-моддаси (Енгилроқ жазо тайинлаш) қўлланилиб, 6 йилга озодликдан маҳрум қилиш жазоси тайинланган.

• Жиззах
• Олий суд