“Пулларингизни оз фурсат ичида кўпайтириб бераман” деб фуқароларни чув тушириб келган фирибгар “трейдер” қўлга олинди. Бу ҳақда Киберхавфсизлик марказининг матбуот хизмати хабар берди.

Унга кўра, Фарғона вилоятида яшовчи М.О. ариза билан мурожаат қилиб, ўзининг банк картасидаги 1 млн сўм пуллари номаълум шахс томонидан фирибгарлик йўли билан ўзлаштирилганлигини маълум қилган.

Тезкор-қидирув хизмати Киберхавфсизлик бўлинмалари ходимлари томонидан ўтказилган тезкор-қидирув тадбирлари натижасида, мазкур жиноятни Фарғона вилоятида яшовчи А.А. содир этганлиги аниқланган.

Гумонланувчи сифатида тергов органларига жалб этилган А.А., жабрланувчи М.О. билан Telegram мессенжери орқали танишиб, унга ўзини трейдерлик фаолияти билан шуғулланишини ва пулларини биржа орқали оз фурсатларда кўпайтириб беришини ваъда қилиб, алдов йўли билан 1 млн сўм миқдоридаги пул маблағларини ўтказиб олишга эришиб, берган ваъдасини бажармасдан пулларни ўз эҳтиёжларига сарфлаб юборган.

Мазкур ҳолат юзасидан А.А.га нисбатан Ўзбекистон Республикаси ЖКнинг 168-моддаси 3-қисми “г” банди билан жиноят иши қўзғатилган.

Қонунга мувофиқ, Ўзбекистон Республикаси Жиноят кодексининг 168-моддаси 3-қисми “г” бандидаги жиноий хатти-ҳаракатлар учун 5 йилдан 8 йилгача озодликдан маҳрум қилиш жазоси назарда тутилган.

• Киберхавфсизлик
• Трейдер