Грузия прокуратураси мамлакатнинг собиқ бош вазири Ираклий Гарибашвили билан процессуал келишувга эришди. Унга кўра, Гарибашвили 5 йил қамоқ жазосини ўтайди ва давлатга 1 миллион лари (372 минг доллар) миқдорида жарима тўлайди. Сиёсатчига 9 йилдан 12 йилгача озодликдан маҳрум этиш жазоси таҳдид солаётган эди. Шунингдек, Гарибашвилининг уйида тинтув пайтида топилган 6,5 миллион доллар маблағ мусодара қилинди”, дея хабар бермоқда Deutsche Welle нашри.

Октябрь ойи охирида Грузия прокуратураси собиқ бош вазирга жуда йирик миқдордаги ноқонуний даромадларни легаллаштириш бўйича расман айблов қўйганди. Тергов версиясига кўра, Гарибашвили 2019–2024 йилларда мудофаа вазири, кейинчалик эса бош вазир бўлиб ишлаган даврида тадбиркорлик фаолияти билан шуғулланган, олинган даромадларни эса оила аъзоларидан олинган совғалар сифатида расмийлаштирган. Гарибашвили, шунингдек, ўз мулкларини қариндошлари номига расмийлаштирган.

У 2011 йилда ташкил этилганидан буён ҳукмрон “Грузия орзуси” партиясининг аъзоси ҳисобланади. Бир муддат у партия раиси лавозимида ҳам ишлаган.

• Бош вазир
• Грузия