“Жорий йилдаги “Ҳаж-2025” мавсуми давомида Ўзбекистондан 15 мингдан зиёд ҳожиларнинг Ҳаж амалларини тартибли ва намунали адо этишлари таъминланди”, – деб хабар қилмоқда “Дунё” АА.

Мазкур ташкилий ишлар Ўзбекистон Дин ишлари бўйича қўмита, Мусулмонлар идораси ва ишчи гуруҳи аъзолари ҳамда Ўзбекистоннинг Саудия Арабистонидаги элчихонаси ва Жиддадаги Бош консулхонаси кўмагида амалга оширилди.

Жорий йилдаги аа мавсумига ўзбекистонлик ҳожиларнинг Саудия Арабистонига боришлари 13 майдан бошланиб, 30 майга қадар давом этди. Шунингдек, Ҳаж ибодатлари тугаганидан сўнг ҳожиларнинг Ўзбекистонга қайтиб кетиши 12 июндан бошланди. Сўнгги ўзбекистонлик ҳожилар 29 июнь куни ҳаво қатновлари орқали ватанга қайтишди.

Ўзбекистон ҳожиларига енгиллик яратиш мақсадида Саудия Арабистонининг Жидда шаҳридаги Подшоҳ Абдулазиз халқаро аэропортидан Ўзбекистоннинг бир қатор вилоятларига тўғридан-тўғри авиақатновлар йўлга қўйилди.

Ўзбекистонлик ҳожиларнинг соғлиқлари ва сиҳат-саломатликларига алоҳида эътибор қаратиш масаласида Ўзбекистон ҳукумати томонидан барча зарур чора-тадбирлар кўрилишига қарамай, бу йилги Ҳаж ибодати пайтида кузатилган жазирама натижасида ва сурункали касаллиги бўлган тўрт нафар ўзбекистонлик Саудия Арабистонида вафот этди.

Шунингдек, Ўзбекистон мусулмонлари идорасининг огоҳлантиришларига қарамай бу йилги Ҳаж мавсумига ноқонуний йўллар билан борган яна тўрт нафар ҳожилар ушбу мамлакатда оламдан ўтди.

Бундан ташқари, Ҳаж ибодати тугаганидан сўнг Бош консулхонага 40 нафардан зиёд зиёратчилар хорижга чиқиш паспортларини йўқотгани боис Ўзбекистонга қайтиш гувоҳномасини расмийлаштириш учун мурожаат қилган.

Мазкур “Ҳаж-2025” мавсумида Ўзбекистоннинг Жиддадаги Бош консулхонаси фуқароларга барча зарур консуллик-ҳуқуқий ёрдамни тезкорлик билан кўрсатиб келмоқда.

• Haj
• Ўзбекистонлик
• Зиёратгоҳ