Исроил ноябрь ойида ўт очишни тўхтатиш бўйича келишув кучга кирганидан бери биринчи марта Ливанга қатор кучли авиазарбалар берди. Бу зарбалар Исроил ҳудудига бир нечта ракета учирилганидан кейин амалга оширилган.

Исроил қўмондонлиги Эрон билан яқин алоқаларга эга бўлган “Ҳизбуллоҳ” ҳаракатининг жанубий Ливанда жойлашган ўнлаб ракета учириш қурилмалари ва қўмондонлик маркази йўқ қилинганини хабар қилган.

Ливан Соғлиқни сақлаш вазирлиги зарбалар оқибатида икки киши, жумладан, бир бола ҳалок бўлганини ва яна саккиз киши жароҳат олганини маълум қилди.

Ливан армияси мамлакат жанубида “учта ракета учириш қурилмаси” демонтаж қилинганини билдириб, Ливан мудофаа вазири тергов ишларини бошлаганини эълон қилган.

Исроил армияси мамлакат шимолидаги Метула шаҳрида учта ракета тутиб қолинганини эълон қилди. Жабрланганлар ҳақида эса хабар берилмаган.

Ливандаги энг йирик қуролли гуруҳлардан бири ҳисобланувчи “Ҳизбуллоҳ” Исроилга ракета учирганини инкор этди ва 14 ойлик зўравонликдан кейин Ливанда нисбий тинчликни таъминлаган ўт очишни тўхтатиш келишувига содиқ қолишини билдирган.

• Havo hujumi
• Isroil
• Livan