Ҳиндистон шимолидаги Жамму ва Кашмир ҳудудида содир бўлган отишмада ўнлаб сайёҳлар ҳалок бўлди. Фожиа Пахалгам шаҳрида юз берган. Сайёҳлар Бойсарон водийсидаги сўқмоқ бўйлаб кўтарилаётганда, қуролланган шахслар уларга қарата ўт очган. Камида 27 киши, жумладан, икки нафар чет эллик ҳалок бўлгани маълум. Отишмадан сўнг ҳуқуқ-тартибот идоралари ходимлари ва тиббиёт ходимлари воқеа жойига етиб келишган. Маҳаллий ҳокимият ҳодисани теракт деб баҳоламоқда.

Эндиликда Ҳиндистон Кашмирдаги терактдан сўнг Аттари назорат-ўтказиш пунктини ёпди. 1960-йилги Инд дарёси сувларидан фойдаланиш бўйича битим дарҳол тўхтатилди.

Покистон фуқаролари учун SAARC доирасидаги визасиз кириш тартиби бекор қилинди. Илгари берилган барча SPES визалари ноллаштирилади. Покистон фуқаролари мамлакатни икки сутка ичида тарк этиши керак. Бундан ташқари покистонлик ҳарбий маслаҳатчилар Ҳиндистондан чиқариб юборилиши кутилмоқда.

Айни пайтда Саудия Арабистонида бўлиб турган Ҳиндистон Бош вазири Нарендра Моди мамлакат ички ишлар вазири Амит Шоҳ билан телефон орқали боғланиб, ундан зудлик билан чоралар кўришини ва воқеа жойига боришни сўраган.

“Терроризмга қарши курашиш борасидаги қатъиятимиз мустаҳкам ва янада кучаяди”, – деб ёзган Моди Х ижтимоий тармоғидаги саҳифасида.

Амит Шоҳ Жамму ва Кашмирга “барча идоралар билан хавфсизлик масалалари бўйича шошилинч йиғилиш” ўтказиш учун йўл олган.

Маълум қилинишича, теракт учун жавобгарликни “Қаршилик фронти” гуруҳи ўз зиммасига олган.

• Ҳиндистон
• Покистон
• Теракт