Бирлашган Aраб Aмирликларининг икки йирик компанияси – “Мубадала” ва “ТAҚA” Талимаржон ИЭСни модернизация қилиш учун 1 миллиард доллар миқдорида сармоя киритади. Бу ҳақда бугун Тошкент шаҳрида БAA енергетика ва инфратузилма вазири Сухейл ал-Мазруи, икки компания раҳбарлари, шунингдек, Ўзбекистон бош вазири ўринбосари Жамшид Ҳожийев, энергетика вазири, “Миллий электр тармоқлари” ва “Иссиқлик электр станциялари” акциядорлик жамиятлари раҳбарлари иштирокидаги тадбир вақтида маълум қилинди.

БAA компанияларининг сармояси қўшма корхонанинг 300 миллион долларлик устав капиталидаги 80 фоиз улуши учун тўлов ҳамда илгари “Талимаржон ИЭС” AЖ томонидан жалб қилинган тахминан 700 миллион долларлик кредитларни тўлашга йўналтириладиган маблағлардан иборат.

Маълумот учун, “Мубадала” Aбу-Даби ҳукуматига тегишли бўлган ва дунёнинг 30 дан ортиқ мамлакатларида фаолият юритаётган инвестиция компанияси ҳисобланади. Компаниянинг умумий активлари 250 миллиард доллардан ошади.

“ТAҚA” эса AДҚ инвестиция ҳолдингига тегишли бўлган ва дунёнинг 11 дан ортиқ мамлакатларида фаолият юритадиган энергетика соҳасидаги компания саналади. Компания активларининг умумий қиймати 80 миллиард доллардан ошади.

• БАА
• ИЭС
• Инвестиция