Миллиардер Илон Маскнинг ёшлик йилларидаги севгилиси Женнифер Гвинн тадбиркорнинг эски суратлари, унинг совғалари – тақинчоқлар ва табрикномаларни кимошди савдосига қўйди. У миллиардерга тегишли суратларни узоқ йиллар давомида сақлаб келган, кейин эса ўғлининг ўқиш пулини тўлаш мақсадида буюмларни сотиб юборишга қарор қилган.

Гвинн ва Илон Маск Пенсилвания университетида таҳсил олаётган вақтлари учрашиб юришган. Уларнинг муносабатлари бир йил давом этган, бу вақтда Гвинн бўлғуси миллиардернинг онаси, унинг яқинлари билан танишиш, Маскнинг электромобиллар ҳақидаги режаларидан бохабар бўлишга улгурган.

Гвиннинг айтишича, Маскнинг келгусида муваффақиятга эришишини ўша вақтлардаёқ ҳис қилган. "Унинг бор диққат-эътибори ўқишга қаратилганди, ўша вақтлардаёқ электромобиллар ҳақида гапирарди. Режалари катта эди", – дейди Гвинн.

Женнифер ва Илоннинг муносабатлари 1995 йилда бўлғуси миллиардернинг Калифорнияга кўчиб ўтиши билан якун топган. Женнифер уни кўриш учун Калифорнияга келган. Илон эса қизга ажралишни таклиф қилган.

"Орадаги масофа узоқ эди, у телефон орқали суҳбатлашишни ёқтирмасди. Телефон орқали суҳбатлашишни вақтни беҳуда сарфлаш деб биларди", – дейди Женнифер.

Илон Маск Женнифер билан муносабатларига нуқта қўйгандан кейин орадан кўп вақт ўтмай биринчи рафиқаси, канадалик ёзувчи Жастин Маскка уйланган. Тадбиркор айни вақтда дунёдаги энг бадавлат одам ҳисобланади. Унинг умумий бойлиги миқдори 262.9 миллиард АҚШ долларини ташкил этади.

• Аукцион
• Ilon_Mask
• машҳурлар
• миллиардерлар