Индонезия президенти Жоко Видодо G7 давлатлари раҳбарларини можароларни тўхтатиш ва бутун дунёда тинчлик ўрнатиш учун жасорат ва инқилоб қилишга чақирди. Бу ҳақда Индонезиянинг АНТАРА агентлиги хабар берди.

"Раҳбарлар сифатида биз бу дунёда ўзгаришлар қилиш ва барча можароларга барҳам беришимиз, шунингдек, катта инқилоб қилиш учун жасорат ва тайёрликка эга бўлишимиз керак. Можаролар фақат инсонларнинг қурбон бўлишига олиб келади. Барча томонлар тинчлик, барқарорлик ва фаровонликни истайди. Аммо дунёдаги ҳозирги вазият бунга мос келмайди”, – деди Видодо Япониянинг Хиросима шаҳрида бўлиб ўтган G7 саммити чоғида сўзлаган нутқида.

Индонезия президентининг қўшимча қилишича, “ишончсизлик чуқурлашиб бормоқда, рақобат кучаймоқда, урушлар ва можаролар ҳамма жойда давом этмоқда”.

"Можароларни ҳал қилишда биз сезиларли ютуқларга эришмадик. Келинг, биргаликда вазиятни ўзгартирайлик", – дея хулоса қилди Видодо.

19-21 май кунлари Япониянинг Хиросима шаҳрида G7 саммити бўлиб ўтди. G7 аъзоси бўлмаган Индонезия меҳмон сифатида таклиф қилинди.

• G7
• Indoneziya