24 январь куни маҳаллий вақт билан 20:00 лар атрофида Истанбул шаҳрининг Шишли туманида Қуюулибоғ кўчасидаги чиқинди контейнерларидан бирида аёл кишининг чойшабга ўралган жасади топилган.

Дастлабки маълумотларга кўра, жасадни маҳаллада чиқиндиларни саралаб юрувчи шахс топган. У дарҳол машъум топилма ҳақида полицияга хабар берган. Шундан сўнг ҳудуд ўраб олиниб, далилларни йиғиш ишлари олиб борилган.

Аёлнинг боши ва кесиб олинган оёқлари солинган жомадон ҳудуддаги бошқа чиқиндихонадан топилгани айтилмоқда.

Ҳолат бўйича кенг қамровли тергов ишлари бошлаб юборилган. Ҳуқуқ-тартибот идоралари маълумотларига кўра, воқеа 24 январь куни кечқурун рўй берган. Ҳудудга полиция ва криминалистика гуруҳлари жалб этилиб, жасад суд-тиббий экспертизага юборилган.

Тергов жараёнида аёлнинг шахси аниқланиб, у 37 ёшли Ўзбекистон фуқароси Дурдона Ҳакимова экани маълум бўлган. Ушбу жиноий иш бўйича Истанбул прокуратураси томонидан жиноят иши қўзғатилган.

Расмийлар иш жамоатчилик назоратида эканини таъкидлаб, барча версиялар кўриб чиқилаётганини билдирган.

Шунингдек, аэропорт орқали Грузияга қочмоқчи бўлган ўзбекистонлик икки гумондор ушлангани хабар берилмоқда.

Истанбул прокуратураси натижалар бўйича қўшимча маълумот берилишини маълум қилган.

• Истанбул
• Ўзбекистонлик
• Қотиллик
• Туркия
• fuqaro