Кеча, 22 январь куни Истанбул аэропортига борадиган янги метро йўналиши ишга туширилди. Бу Европадаги энг тезюрар метро, деб топилди.

Поездлар соатига 90-120 километр соат тезликда ҳаракатланади. Маълум қилинишича, қурилиш ишларида бир вақтнинг ўзида 10 та туннель бурғилаш машинасидан фойдаланилган.

Янги метро йўналиши 34 километр бўлиб, Кайитхона бекатидан йўлга чиққан поезд 24 дақиқада аэропортга етиб келади.

Янги линия очилиши маросимида қатнашган мамлакат Президенти Режаб Таййиб Эрдоған «мазкур лойиҳанинг ишга туширилиши Туркиянинг бутун дунёга метро қурилиши ишида қудрати ва имкониятини кўрсатди», – деб фикр билдирган.

Шунингдек, Президент Эрдоған, Кайитхона–Истанбул аэропорти метро линияси бир ой давомида бепул бўлишини ҳам маълум қилган.

Келажакда мазкур метро йўналишини Истанбулнинг Осиё қисми билан ҳам боғлаш натижасида унинг узунлигини 69 километрга етказиш, кунига 800 минг йўловчига хизмат кўрсатиши режалаштирилган.

• Эрдоған
• Метро
• Туркия