Жаҳон банки Ўзбекистонга ирригация ва дренаж инфратузилмасини модернизация қилиш лойиҳасини амалга ошириш учун имтиёзли кредит ажратади. Бу ҳақда молия ташкилоти сайтида хабар берилди.

Бундан кўзланган мақсад суғориш жараёнида сув йўқотилишини камайтириш, ирригация тизимларининг энергия самарадорлигини ошириш ва фермерларга хизмат кўрсатиш сифатини оширишдан иборат. Лойиҳа Жаҳон банкининг Марказий Осиёда сувдан фойдаланиш самарадорлигини ошириш ва сувни тежаш бўйича минтақавий дастурининг бир қисмидир.

Кредит миқдори 200 миллион долларни ташкил этади. Лойиҳа доирасида Қорақалпоғистон, Бухоро, Қашқадарё, Сурхондарё ва Наманган вилоятларидаги Сирдарё ва Амударёдан олиб ўтадиган умумий узунлиги 259 километр бўлган 8 та магистраль канал бетонланади. Иш давомида геомембранлар ва замонавий сув тежовчи материаллар қўлланилади.

Шунингдек, лойиҳа сув тақсимотини назорат қилиш учун 470 та гидротехника иншоотини қуришни ҳам ўз ичига олади.

Сув йўлларида созланиши мумкин бўлган сув чиқариш ва ҳисобга олиш мосламалари ўрнатилади. Сув таъминотини бошқариш учун назорат ва маълумотларни йиғиш тизимлари жорий этилади.

“Режалаштирилган тадбирлар қишлоқ хўжалиги маҳсулдорлигини ошириш, сувдан фойдаланувчиларнинг фаровонлигини ошириш, шунингдек, ирригация ва агросаноат тармоқларида янги иш ўринларини яратишга хизмат қилади”, – дейди Жаҳон банкининг Марказий Осиёдаги ваколатхонаси раҳбари Татяна Проскурякова.

• Жаҳон банки
• Кредит
• Ўзбекистон