Жаҳон банкининг ижрочи директорлар кенгаши Ўзбекистон учун 250 миллион долларлик молиялаштириш пакетини маъқуллади.

Ушбу маблағлар “шаҳарларда яшаш ва маҳсулдорликни ошириш учун қулай шароитлар яратиш” (Ливабле and Productive Cities Program, LPCP) дастури доирасида мамлакатнинг 16 та туман ва шаҳарларида аҳоли ва бизнес учун шаҳар инфратузилмаси ва хизматларини ривожлантиришга йўналтирилади. Ўзбекистоннинг 37 миллион аҳолисининг ярмидан кўпи шаҳарларда истиқомат қилади. 2050 йилга келиб бу улуш 60 фоиздан ошиши кутилмоқда. Тез урбанизация шаҳарсозлик ва бошқарув тизимини, инфратузилма ва коммунал хизматларни, шу жумладан жамоат транспорти ва чиқиндиларни бошқариш хизматларини такомиллаштиришни талаб қилади.

Лойиҳа доирасида ижтимоий ва коммунал инфратузилма, транспорт, савдо ва ишбилармонлик муҳити, туризм объектлари ҳамда жамоат жойларига сармоя киритилади. Хусусан, мактаблар ва боғчалар, тиббиёт муассасалари, сув таъминоти ва канализация тизимлари, йўллар, пиёдалар ҳудудлари, бозорлар, боғлар ҳамда шаҳарларни сув тошқинларидан ҳимоя қилиш иншоотлари янгиланиши режалаштирилган.

Жаҳон банки ҳисоб-китобларига кўра, 2030 йилга қадар мазкур дастур орқали 1 миллионга яқин аҳолининг турмуш шароити тўғридан-тўғри яхшиланади. Фойда кўрувчиларнинг тахминан ярмини аёллар ташкил этади. Шунингдек, 300 минг нафар аҳоли учун транспорт хизматларидан фойдаланиш имкониятлари кенгаяди, 400 минг киши эса янги ёки янгиланган жамоат жойлари ва боғлардан фойдаланади.

• Жаҳон банки
• Ташқи қарз