Ўзбекистон Республикаси Вазирлар Маҳкамаси “Жамоат транспортини молиялаштиришнинг янги тизимини ташкил этиш чора-тадбирлари тўғрисида” қарор қабул қилди.

Унга кўра, жамоат транспортини молиялаштиришнинг янги брутто-шартнома (йўналишларда чекланган тарифларда йўловчи ташиш хизматлари учун “босиб ўтилган йўл” ва “сифат” мезонларидан келиб чиққан ҳолда ҳисоб-китоб қилишни назарда тутувчи ваколатли орган ва ташувчи ўртасида тузилган шартнома) тизими жорий этилади.

Қорақалпоғистон Республикаси Транспорт вазирлиги, вилоятлар ва Тошкент шаҳар транспорт бошқармалари томонидан йўналишлар ташувчиларга бириктирилиши, йўловчиларни мунтазам ташишни амалга оширувчи ташувчиларга ва бундай ташишларни амалга оширувчиларга қўйиладиган талаблар, мажбурий шартлар ҳамда ташувчининг мажбуриятлари ва жавобгарлилиги, бажарилган иш ҳажми ва ташувчига тўланадиган тўлов миқдори тартиби низомда белгилаб қўйилган.

Йўналишларни ташувчиларга бириктириш бўйича тендер савдолари қонунчилик ҳужжатларида белгиланган тартибда амалга оширилади.

Ваколатли орган тендер ўтказилишидан камида олтмиш календарь кун олдин тендерга чиқариладиган йўналишларни белгилайди, уларнинг паспорти ва талабларини ишлаб чиқади. Йўналишларнинг бошланғич нархини шакллантиради ҳамда иқтисодиёт ва молия органлари билан келишади.

Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари йўналишларни тендерга чиқариш жадваллари тасдиқланишини таъминлайди ва оммавий ахборот воситаларида эълон қилади.

Йўналишларнинг якуний нархи йўналиш бўйича ўтказилган тендер натижаларига кўра ташувчилар томонидан тақдим этилган энг яхши таклиф асосида аниқланади ва брутто-шартномада кўрсатиб ўтилади.

Тендер ғолиби икки кун муддатда ваколатли органга – автобусларни автоматлаштирилган диспетчерлик хизматига улаш, шунингдек, АТТО операторига – автобусларга автоматлаштирилган тўлов тизими терминалларини (валидаторлар) ўрнатиш учун ҳаракат таркиби сақланадиган автосарой ёки тўхташ жойи манзилини кўрсатган ҳолда мурожаат қилади.

Ваколатли орган ва АТТО оператори тендер ғолиби аризаси келиб тушган кундан бошлаб ўн кун муддатда автобусларни автоматлаштирилган диспетчерлик хизматига уланиши ҳамда валидаторлар ўрнатилишини бепул таъминлайди.

Ваколатли органлар ёки уларнинг қошида тузилган ташкилот ходимлари йўлкира ҳақи тўланиши ва ташиш хизматлари сифатини назорат қилади.

Ташувчи томонидан қатновларни иш жадвалига мос равишда бошлаш-тугатиш ҳамда оралиқ бекатларга келиш-кетиш вақтларига риоя қилиниши, белгиланган ҳаракат интервали ва мунтазамлиги таъминланиши, шунингдек, ҳайдовчи ва автобуслар учун қўйилган минимал талаблар бажарилиши лозим бўлади.