Тошкент шаҳрининг марказий кўчалари бўйлаб 475 километрга яқин 34 та алоҳида автобус йўлакларини ташкил этилган. Пойтахтда автобуслар учун чизилган йўлакчалар жамоат транспортларининг тирбандликда қолмаслиги учун яратилган. Ушбу йўлакчаларда автобуслардан ташқари фақатгина тез ёрдам, ёнғин хавфсизлиги ва ИИВ автомобиллари ҳаракатланиши мумкин. Қолган автотранспорт воситаларига эса ҳаракатланиш тақиқланади ва бу тегишли жавобгарликка сабаб бўлади.

Автомобилларга фақат маълум сабабга кўра, хусусан, йўл ёқасидаги объектларга ёки кўчага кириш учун ушбу йўлакдан фойдаланишга рухсат этилади. Бунинг учун йўлакчаларда узиқ чизиқлар мавжуд бўлиб, тахминан 40-50 метр масофа белгиланади. Кўча ёки объект бошланган жойда ушбу узиқ чизиқларнинг таъсир доираси тугайди ва автомобиллар автобуслар учун мўлжалланган йўлакчани бўшатиб қўйишлари талаб этилади.

Маъмурий жавобгарлик тўғрисидаги кодекснинг 128-моддасига кўра, ҳеч қандай сабабсиз мазкур тасмага ўтиб ҳаракатланган ҳайдовчилар БҲМнинг иккидан бир қисми (150 минг сўм), ажратилган тасмада сабабсиз тўхтаб турган ҳайдовчилар эса 128-6-моддасига кўра БҲМнинг 2 баравари миқдорида (600 минг сўм) жаримага тортилади.

• Автобус
• Жарима
• Qoidabuzarlik