Диёра Келдиёрова асос солган болалар дзюдо клуби International Judo Federation (ИЖФ) томонидан “Болалар учун энг яхши лойиҳа” деб эътироф этилди. Бу ҳақда МОҚ матбуот хизмати хабар берди.

Тақдирлаш маросими Paris Grand Slam доирасида бўлиб ўтди. Унда IJF 2025 йил лауреатларини эълон қилди ва Келдиёрова ташкил этган клуб алоҳида мукофотга сазовор бўлди.

Эслатиб ўтамиз, Келдиёрова 2024 йил 28 июль куни Парижда ўтган Ёзги Олимпиада ўйинларида тарихий натижа қайд этган эди. У 1/16 финалда япониялик Ута Абени иппон баҳоси билан мағлуб этди. Финалда эса косоволик Дистрия Красничини енгиб, Олимпия чемпионига айланди.

Шу тариқа, у дзюдо бўйича жаҳон чемпионатида кумуш, Олимпиадада эса олтин медаль қўлга киритган илк ўзбекистонлик аёл спортчи сифатида тарихга кирди.

 Маълумот учун, 2024 йилда Келдиёрова Ўзбекистон Республикаси Президенти ҳузуридаги Ижтимоий ҳимоя миллий агентлигининг гендер тенглиги ва болаларга нисбатан зўравонликка қарши курашиш бўйича махсус вакили этиб тайинланган.

• Diyora Keldiyorova
• Дзюдо
• Эътироф
• МОҚ