Лондон тарихда биринчи марта жаҳоннинг асосий молия маркази мақомини йўқотди. Бу ҳақда “Financial Times” газетаси Лондон маъмурияти ҳисоботига таяниб хабар бермоқда.

Қайд этилишича, ҳозирда Буюк Британия пойтахти Нью-Йорк билан бирга етакчилик қилмоқда.

Икки метрополитеннинг ҳар бири 60 балл тўплаган (Лондонда аввал 59 балл, Нью-Йоркда эса 58 балл бор эди). Лондон қарз бериш, тижорат суғуртаси ва активларни бошқариш бўйича етакчиликни сақлаб қолди. Бироқ глобал молиявий марказ сифатидаги мақомини сақлаб қолиш учун Буюк Британия пойтахти тартибга солишни яхшилаши ва чет элдан малакали ишчи кучи оқимини таъминлаши керак эди.

Ўтган йили тобора кўпроқ компаниялар, ҳатто Британия брендлари Нью-Йоркда бирламчи оммавий таклиф (IPO) ўтказишни афзал кўрдилар. Молиявий раҳбарлар буни АҚШда, айниқса, банк ва суғурта соҳасида унчалик “қаттиқ” ишбилармонлик маданияти йўқлиги билан изоҳлашмоқда.

2023 йил феврал ойи бошида Халқаро валюта жамғармаси Буюк Британия иқтисодиёти учун жиддий муаммоларни башорат қилди. Қироллик учун прогноз Ғарбнинг етакчи давлатлари орасида энг ёмони бўлган.