Ўзбекистон элчихонасида “Британия-Ўзбекистон” жамияти билан ҳамкорликда таниқли британ шоири Эндрю Станиленд томонидан илк бор инглиз тилида нашр этилган қорақалпоқ шеъриятига бағишланган “Three karakalpak poets” (“Уч қорақалпоқ шоирлари”) номли китобнинг тақдимоти ташкил этилди. Бу ҳақда “Дунё” ахборот агентлиги хабар берди.

Қайд этилишича, тадбирда Буюк Британия парламенти, ҳукумати, илмий-академик, эксперт-таҳлилий ва жамоат доиралари вакиллари ҳамда ушбу мамлакатда истиқомат қилаётган ватандошлар иштирок этган.

Элчи Равшан Усманов тадбирнинг очилиш қисмидаги нутқида иштирокчиларни республикада амалга оширилаётган кенг кўламли ислоҳотлар ва Ўзбекистон-Британия ҳамкорлигининг ҳозирги ҳолати ва истиқболлари ҳақида батафсил сўзлаб берган.

Хорижий томонга, шунингдек, Ўзбекистон раҳбарияти томонидан олиб борилаётган кенг кўламли ислоҳотлар, жумладан буюк аждодларимиз бой меросини ўрганиш, маърифатпарвар вакилларнинг номларини абадийлаштириш, уларнинг тарихига оид бадиий асарлар ва кинофильмлар яратиш йўналишида олиб борилаётган саъй-ҳаракатлар ҳақида маълумот берилган.

“Британиялик шоир Эндрю Станиленд ўзининг тақдимотида ушбу тўплам ўзбекистонлик шоирлар, таржимонлар ва маданият ходимлари – Гулбаҳор Изентаева, Шаҳноза Кенгесбай қизи, Айнура Назирбаева, Нилуфар Абдуллаева, Наргиза Уразимбетова ва Гулназ Жадигерова билан биргаликдаги ижодий ҳамкорликнинг маҳсули эканини таъкидлади”, дейилади хабарда.

Мазкур китобдан қорақалпоқ адабиётининг йирик намояндалари — Бердақ ва Ажиниёз, шунингдек, замонавий қорақалпоқ шоири Ибройим Юсупов қаламига мансуб танланган шеърларнинг инглиз тилидаги таржималари ўрин олган. Тўплам илк бор хорижий тилда сўзлашувчилар учун тақдим этилмоқда.

• Лондон
• Қорақалпоғистон